上周末兩場英冠全中，不過今周踏入國際賽期，歐洲主要聯賽休息。以往都唔會大注，始終變數多，加上踢一、兩場就停，冇仇報，不過疫情有新思維，見唔少大會球星都踢到五勞七傷，周三友賽扒下冷，重心瑞士作客和比利時（圖）開冷D。
比利時拎完世界盃季軍，陣容亦都好豪華，唔少主力同時係四大聯賽嘅主力，不過正正因為係大隊主力，踢埋歐聯歐霸盃，呢兩個月真係幾乎日日都一周雙賽，貴為比利時副隊長兼曼城隊長，星期日睇住奇雲迪布尼對利物浦，下半場唔好講話重炮遠射，連跑都跑唔郁。最慘連傷癒冇幾耐，啱啱獲重召嘅夏薩特，又中埋武肺，今次國際賽睇怕唔使預佢。連埋泰利文斯同韋素等成班疲兵，連效力國際米蘭嘅盧卡古都因為疫情問題有機會唔會報到，教練馬天尼斯點都會喺星期三呢場友賽畀佢哋回下氣。
瑞士當然就冇比利時咁大名氣，好似阿仙奴中場格列沙加、利物浦翼鋒梳頓沙基利等，都已經叫做主力。不過因為唔算球會核心，變相就踢得少，體力相對優勝；瑞士對強國戰績又唔係太差，上場歐洲國家聯賽就3:3和德國，以海外參考賠率，比利時和波有3.5倍，足智彩就算熱少少都算做唔錯回報。
嫌3倍幾唔夠和味？整多個再冷啲嘅，就係盧森堡W。周三盧森堡主場對奧地利，盧森堡已經唔係以往嘅歐洲魚腩，上輪歐國聯連勝塞浦路斯同黑山，周三主場對奧地利，講真奧軍都只係歐洲3、4線球隊，近期攻力都一般，海外參考賠率盧森堡W有成10倍，足智彩應該有咁上下分頭，少少地敲吓無妨。
文：Goal進
截稿前馬會尚未開盤，盤口僅供參考，讀者記得留意足智彩網頁。