現年39歲的莊韻澄（前名莊端兒）上月忽然宣佈跟比她細五年的IT男呂成忠（Joe）譜出姊弟戀，並於後日閃嫁。喜訊曝光後，《蘋果》收到讀者報料踢爆Joe失業兼破產，當時莊韻澄代為否認，但《蘋果》再連環收到聲稱是Joe的幾位朋友爆大鑊，指Joe借錢唔還。
據知Joe今年初跟拍拖近10年的女友分手，隨即追到莊韻澄，更將於後日閃婚。朋友A指Joe中學畢業，又經常轉工，做過銀行借貸部、保險經紀、揸Uber等，他的卡片上名銜多多，包括「青年創業軍車主會會長」、「環球分析師」等。朋友A說：「聽講係做保險時欠人200幾萬，破咗產，之後改名叫呂雨洋，成日去啲創業平台聚會識老細，𠱁人泵水，但通常唔成功。」朋友B兩年前認識Joe，兩人合作搞fb專頁，但Joe只開工兩日便冇影：「問我借3,000蚊周轉，話賣咗架車後還錢，好耐都賣唔出，又借多3,000蚊。佢邊係IT人，主力打機同吹水。」
《蘋果》還收到兩條錄音，內容為K先生跟疑似Joe的對話，兩人合作搞生意，K先生聲稱有收數佬到公司找Joe追數，又指二人已相識15年。在對話錄音中更踢爆Joe破產：「你同我講破產，我咪一樣同你搞生意。」Joe也沒有反駁。另一名自稱是格仔舖租客的C先生亦出面數臭Joe：「佢執笠前話等佢半年慢慢還，之後人又唔見，電話又唔通，我就冇咗幾千蚊生意額，有啲人連貨都攞唔返。」
莊韻澄昨日回覆《蘋果》，承認Joe破產，她吸了一口氣說：「拍拖後都交代咗，之前唔講係因為太突然，加上佢係圈外人，有諗係咪我搞到佢生活泛起漣漪，佢原本生活好安靜。」但她否認欠債6,000元不還：「唔係好大數目，破產都認，冇理由唔認6,000，佢話係被人屈。」問到有否因Joe破產感到愕然？她說：「咁又冇，好多人都破過產，佢主要係生意上遇到一啲人令佢破產。」又認破產是與保險有關，並表明不會幫手還錢：「都破咗產，梗係等佢（破產令）完，應該仲有年幾。」
對於Joe的IT男身份受質疑，莊韻澄說：「佢係識寫program㗎。」至於Joe現時職業？她說：「佢freelance幫我做嘢，所有嘢都係免費幫我做晒囉，哈哈。」她的心情似乎未有太大影響，問到是否奉子成婚？她笑着說：「我真係好想，我一定會講。」擔心小器？她說：「係啦，遲啲講，但開心嘅。」
