啱啱踢完歐聯冇耐，星期日皇家馬德里就返西甲作客四場不勝嘅華倫西亞，三位正選後衞輪住出醜，1人輸1次12碼，等主隊嘅卡路士蘇拿上演極刑「帽子戲法」，加埋華拉尼嘅烏龍，令球隊以1:4不敵華倫全失3分，賽後教練施丹被質疑輪換過度，佢話會為輸波負全責，賽程咁密又要應付歐聯，真係苦了施丹。
今場皇馬有夏薩特同卡斯米路確診武肺缺陣，不過都有個好開始，賓施馬23分鐘禁區外勁射得手先開紀錄。點知之後先係噩夢開始，華倫嘅荷西加耶傳中，個波喺禁區內省中串演右閘嘅盧卡斯華斯基斯隻手，球證直指12碼，卡路士蘇拿主射被泰拔高圖爾斯撲出，前者即時補射又中柱，最後17歲小將穆沙補中得手。點知球證突然話蘇拿射12碼嗰時，穆沙偷步入咗禁區要重射，結果蘇拿今次再次射右下角破網，擾釀一輪終於喺35分鐘追成1:1。臨完半場前兩分鐘，華倫嘅麥斯高美斯傳中，華拉尼解圍竟然踢高，雖然高圖爾斯已經門前瞓身解圍，但VAR指個波過咗白界，華倫半場反超2:1。
54分鐘，馬些路禁區內踢跌麥斯高美斯又輸12碼，今次蘇拿射左下角中鵠助球隊領先到3:1；63分鐘，沙治奧拉莫斯喺禁區用手拍走個波，令皇馬輸第3球12碼，蘇拿順利射入上演12碼「帽子戲法」，成為21世紀西甲第1位做出呢個成就嘅球員，亦助球隊4:1擊敗皇馬。
賽後教練施丹表示今場輸波冇藉口：「作為教練我要負全責，我哋頭30分鐘嘅表現唔錯，但對手追平後防守表現就係咁跌。」有西班牙媒體將皇馬今仗嘅失利歸咎喺施丹嘅輪換，特別係決定畀艾斯高同馬些路正選，前者近年喺球隊嘅機會越嚟越少，今仗明顯冇貨；馬些路仲大獲，輸12碼之餘，全場失咗23次控球權，係全隊最高，不過，當施丹被問到有冇後悔派呢兩位球員擔正時就話：「佢哋都係皇馬球員，當我喺陣容上改變時，你唔可以怪責落嗰幾位球員身上。」
皇馬今仗輪波後已經跌落聯賽第四，而皇家蘇斯達今輪主場2:0擊敗CF格蘭納達，9戰6勝2和1負有20分排喺榜首，第三位係唯一嘅不敗之師馬德里體育會。