從前，有一個垂老嘅帝國，搖搖欲墜。歐洲勢力，主要係英國勢力，趁住呢個時候，呢個時候，逼到帝國要開放一個港口城市，同歐洲打開門做生意。
呢個港口城市，身處最有利嘅地理位置，喺正主要貿易航線嘅要塞，喺嗰一帶裏頭，最啱做轉口港，食正帝國對外貿易起飛條水，一躍成為歐亞貿易嘅中間點。喺十九世紀中期，短短三十年間，出口增加足足三倍。
個港口城市，基本上脫離垂老帝國嘅統治。一個豆膶咁細嘅城市，之所以能夠獨立於龐大帝國，當然唔係因為夠打，而係帝國礙於英國勢力，自己又五勞七傷，所以企埋一邊，忍住唔搞搞震。
於是，個港口就成為咗喺成個區域裏面，最國際、最多元、最自由嘅城市，仲越起越多建築物、酒店、海濱長廊咁，所以俾人改埋個綽號，叫「東方巴黎」。
嗰個垂老帝國，係奧圖曼帝國。而個港口城市，叫Smyrna，即係而家土耳其嘅Izmir伊士麥。
未聽過？好正常，因為後來俾人整瓜咗。
故事發展到第一次世界大戰之後，奧圖曼帝國終於瓦解，點不知，同一時期，土耳其國家主義冒起，而英法勢力自己拆唔掂數，冇再力撐Smyrna，終於Smyrna淪陷。
結果，本來主導城市嘅希臘人被逼走，個城市改埋名做Izmir，喺偉大嘅土耳其國家經濟旗幟底下，淪為國家嘅其中一個城市而已。
Smyrna唔係個別例子，類似嘅故事，重演咗喺好多港口城市身上。
同港口城市相對嘅，就係內陸。港口係邊界同外地往來嘅接口，必然係比較內陸自由、多元、包容，所謂cosmopolitan。
過去一百年，一眾港口城市面對嘅最大威脅，就係喺愛國主義旗號底下，俾內陸政權收皮。cosmopolitan，正正係內陸眼中，港口城市嘅死罪。
大航海時代，亞洲港口城市開到埠，全靠西歐勢力加持。內陸總係比港口城市大好多。所以，港口城市生存從來好脆弱，只不過慣咗有外國保護嘅時候，容易產生幻覺，以為能夠生存係必然。
但其實就算有外國勢力撐住，極其量只係可以頂得住內陸入侵。乜嘢「由港口X反攻建設民主內陸Y」，係好理想嘅願望。只不過，近代歷史上，近乎未試過有港口城市改變返內陸轉頭。
當保護嘅勢力消退，內陸勢力就會肆虐。而一旦港口城市內陸化，就係急速衰落嘅開始。
你睇吓同香港同期開埠，本來嘅「遠東巴黎」上海，原本喺國際個朵仲響過香港，自從喺二戰俾自稱「頭號反殖反帝愛國戰士」蔣介石接管之後，再失埋俾中共管治之後，到而家，都仲係講近N年後超越香港。
面對自開埠以嚟，最嚴峻嘅內陸化危機，香港人盡力對內拖延對外求救，寧願攬炒都唔肯go down without a fight。蓬佩奧外交呢兩年積極將香港問題，放入侵侵對抗中国崛起、同自由世界盟友連線天下圍中嘅框架裏面，由聲援香港到制裁官員，不停打破前朝嘅限制。
中共不斷加快手腳，香港擺脫港口城市宿命越嚟越窄，呢個時候換咗講到明「中国唔係頭號敵人」嘅拜登政府，到底會幾大力度去延續蓬佩奧嘅對抗極權中国政策？香港命運進入倒數時刻。
撰文：宋漢生
fb : sunghsblog