Facebook專頁「歷史時空」版主上月辭世，使人惋惜難過。我也是專頁的捧場客，閒來瀏覽上面的老照片舊影片，神遊於消逝的歲月，對照今昔，時有令我驚奇不已的發現，例如一九七四年TVB直播上海街寶生銀行劫案的片段，過程超現實之餘，更有不少周星馳式笑料。
當年三十歲的劫匪李惠彬，單人匹馬持點三八左輪手槍打劫寶生銀行，因為趕不及逃走，挾持十一個銀行職員，與警方對峙二十小時，最後職員趁他打瞌睡，合力把他制服。事件轟動全城，TVB更破天荒直播二十小時，相信很多年長讀者俱記憶猶新 。
這劫案最抵死的情節，是記者致電銀行訪問劫匪，而劫匪又樂意應機。能夠一邊兵凶戰危脅持人質，一邊氣定神閒接受專訪，除了李惠彬外，我還沒見過第二個事例。一位訪問的記者是無綫新聞姚兆江，李惠彬以類似鄭君綿而帶口音的粵語，彬彬有禮回應，兩人暢談甚歡，相逢恨晚，容我抄幾句令我笑到有腹肌的對話。
記者：「嗱我哋係無綫電視嘅，你平時都有睇我哋新聞㗎喇，我哋報道係非常之正確，好中肯嘅，咁你可唔可以接受我哋做你哋嘅調停人呢？」劫匪：「無任歡迎。」七十年代記者可以撈埋談判專家嗰份？換着今日分分鐘屈你係同黨，先打爆你眼，再拉埋你返差館呀。
記者：「啲職員係無辜嘅，佢哋都有權利生存。」「冇錯。」「你可唔可以保證人質安全？」「我可以答應，但如果警方開槍，後果應該係警方負。」「係，係。」「警方畀兩架車我哋走，我哋就聽天由命，走得甩就走，走唔甩畀你捉、畀你殺係另一回事，啱唔啱？」「啱，呢個啱。」當年社會確實和諧，記者跟劫匪有共同價值觀，也不會被標籤「黑記」。
記者：「你有幾支槍？」「四支。」「幾多子彈？」「呢啲唔講得。」「咁你除咗槍仲有咩武器？」「唔講得，對唔住。」當年的一個賊，竟斯文得跟記者講「對唔住」。相較之下，十一月五日新界北刑事部警司游乃強出席記招時，卻當眾爆出一句「咁撚多位朋友」。論待人接物，李惠彬完勝今天警方和所謂行政長官。