八方之前寫過，早已上咗美國制裁榜嘅特首林鄭月娥，佢喺上星期開行會前講美國總統選舉嘅評論，似乎係暗撐民主黨拜登當選，不過噚日拜登發表勝利演說後，包括台灣在內等全球多位領導都回應結果同恭賀拜登，但港府未有回應，仲慢過2016年梁振英做特首嗰陣出聲恭賀特朗普當選。有政界人士相信，因為北京仲未出聲恭賀拜登當選，作為「妹仔」嘅林鄭又點敢快過北京？
八方睇返2016年，前特首梁振英當年喺特朗普發表勝利演說後約四個多小時，已經透過政府新聞處發聲明「恭賀特朗普在美國總統選舉中獲勝」。林鄭一向唔鍾意輸，今次竟然慢過689，唔知係咪因為中國政府亦係至今未回應，身為「妹仔」梗係睇住北京頭，唔好輕舉妄動。
睇返當年689份聲明，指香港嘅自由市場政策同良好法治等優勢，能夠為美國企業提供穩健基礎，喺內地以至亞太市場拓展新機遇，仲話「期望繼續深化與美國的聯繫」，但今時唔同往日，777自己都俾美國制裁緊，即使拜登做美國總統，相信短期內佢同一眾特區官員受到嘅制裁，都唔會被解禁，更加唔好講佢任內至今不但未見深化同美國聯繫，仲有反對港區國安法係民主、共和兩黨共識，即使換咗美國總統，要改善港美關係都唔易，八方有向特首辦查詢點睇美國大選結果，但到截稿前未見回覆。
李八方