文革批鬥席捲香港，梁振英大力搞緊教育界、警方設立國安「篤灰」熱線圍堵黃營，建制派都唔執輸，年初已組成「議會監察」聲稱要監察區議會運作，狙擊目標無非係去年11.24區選大勝嘅民主派。
民建聯嘅劉佩玉同工聯會嘅葛兆源噚日以「議會監察」名義舉行記者會，話過去一個月喺各區進行「攬炒派『播毒』橫額大搜查」行動，至今發現84條banner涉及「抹黑」政府同宣揚仇恨警察情緒，但佢連「反對大灣區種票」、「警黑合作，市民受害」等都計埋，仲好意思反問：「點解唔讚吓政府呢？」講到最尾，佢哋要求政府設立審批橫額準則，如果唔符準則，民政署就唔應該發還開支。
作為代表市民嘅議員，八方都好想問佢，同樣地唔少政府部門做得好差，點解保皇黨唔插吓呢？八方仲醒起，劉佩玉一個月前以「接獲數十名家長投訴」為由，狙擊本地漫畫家林祥焜幫深水埗西九龍中心設計嘅一系列性感少女外牆廣告，不過市民似乎係插佢多過認同佢，商場喺颱風過後，唔單止重掛林祥焜嘅性感少女漫畫，仲掛起由另一位本地漫畫家甘小文所畫嘅「肥婆四」同「哨牙珍」漫畫，市民拍手叫好，從呢件事可見，劉佩玉嘅「監察」究竟有幾代表民意。
李八方