周日嘅意甲早場，班霸祖雲達斯作客鬥拉素，面對有幾位主力因為確診武漢肺炎而缺陣嘅拉素，雖然祖記上半場有復出後大勇嘅基斯坦奴朗拿度（C朗）開紀錄，但之後冇波入下，仲喺完場前俾對手前鋒卡些度把握機會射入追平，只可以打成1:1完場，慘失兩分。
今場祖記有上周中歐聯梅開二度嘅艾華路莫拉達同C朗一齊正選攻堅，相反對手拉素就有恩莫比尼同盧卡斯賽前接受武肺病毒檢測繼續呈陽性，所以要接受隔離冇得上陣。比賽早段祖記一路都係主動啲嗰隊，更加喺15分鐘有古達度右路傳急勁地波，C朗門前加一腳搞掂先開紀錄，亦都以呢個比數完半場。
下半場兩隊形勢膠着，祖記兩位前鋒C朗同莫拉達踢踢吓都受傷被迫退下火線，令到球隊踢得更加保守。正當諗住可以保住1:0勝局到完場，補時去到最後時刻，拉素嘅祖亞昆哥利亞左路一次突破連過幾個守衞，傳畀禁區入面嘅卡些度，後者轉身起腳破網，幫拉素追成平手後就即刻完場。