現年83歲的資深演員余慕蓮（魚毛），大前晚傳出因患上肺纖維化要在伊利沙伯醫院深切治療部（ICU）留醫，《蘋果》記者當晚致電余慕蓮手機時，接聽女護士表示：「佢𠵱家插晒喉啦！你叫屋企人唔使打嚟喇。」消息指魚毛要換血及進行小手術，目前仍在ICU留醫。
據了解，余慕蓮不幸患上血癌，其身邊好友向《蘋果》表示：「原本要打標靶藥，但醫生話唔可以打住，因為佢情況唔太好，所以要喺ICU同佢洗血，因為啲血病菌傷害咗個肺，所以佢個肺好弱，要同佢插喉。」
其後，《蘋果》致電魚毛好友鄧達智，問及魚毛是否患上血癌？他表示：「醫生當時係咁同佢講，我唔知佢有冇聽錯，始終佢年紀大，我知佢換血，有啲嘢被感染到。」鄧達智透露魚毛一直想將所有身家捐給慈善機構，但她還未簽好文件便入了院，鄧達智說：「我哋有個好朋友勸佢簽咗啲文件先入醫院，如果唔係有乜事你入咗院都唔知點搞，點知佢可能心急，自己call白車入去，應該係11月2號。佢入咗院之後，醫生曾經同佢講，你想見邊啲朋友，就叫邊啲朋友嚟見佢，我哋聽到之後都知道大鑊，點知佢見咗第一批朋友後，佢就入咗ICU，輪到我第二批見唔到，𠵱家都冇人知道佢情況點。」
安德尊跟魚毛份屬友好，他昨日接受傳媒訪問時，被問到魚毛是否患血癌，安德尊回應說：「又唔係，只不過治療中，血發炎，要幾日治療。」其實，83歲的余慕蓮早前患上耳石移位，今年8月咳嗽不適入院留醫，當時醫生診斷她肺纖維化，並非武漢肺炎，最終留院八日才回家，而余慕蓮這段期間都在家休養。
對於患上血癌的病人要如何醫治，據養和醫院血液科梁憲孫醫生表示，要視乎病人患哪一種血癌，他說︰「血癌有一百幾十種，一般治療方法都係化療，有標靶藥就會用埋標靶藥，如果有需要會做骨髓移植，𠵱家又有免疫治療。」問到較年長人病人患血癌，醫治會否較困難？梁醫生說︰「一般嚟講老人家係困難啲，如果慢性會好啲，急性就會較麻煩。」
