上周六西甲巴塞隆拿喺主場以5:2擊敗貝迪斯，終於結束喺西甲四場不勝嘅頹勢，更令球迷高興嘅係，後備出場嘅美斯除咗射入一球12碼外，仲終於入到佢今季第一個「生波」入球，梅開二度一洗「散步帝」污名。
巴塞上周三喺歐聯分組賽，主場以2:1險勝基輔戴拿模，美斯又俾球迷捉到佢喺場上懶懶閒，對手喺正面前帶住個波跑過，呢位阿根廷球王都可以無動於衷繼續「散步」，就連眼神防守都慳番，結果俾網民圍插。事後就事件有為美斯辯護嘅巴塞教練朗奴高文，今場先收起美斯，派出安素法迪、基沙文同奧士文尼迪比利攻堅。佢哋喺22分鐘就由迪比利先開紀錄，安素法迪之後亦都博到12碼，可惜基沙文主射宴客，到上半場補時仲俾貝迪斯追番1:1。
見到勢色唔對，高文半場就派美斯入替受傷嘅安素法迪，巴塞即刻生猛番晒，49分鐘就由基沙文喺門前輕鬆射成2:1。貝迪斯守將艾沙文迪之後喺禁區內用手擋波，領紅之餘仲要輸多球12碼。美斯主射中鵠，攞到個人今季喺各項賽事嘅第五個入球，亦即係佢射入嘅第五個12碼，幫巴塞領先到3:1。巴塞之後雖然又俾貝迪斯嘅羅倫摩朗追番球，但到82分鐘，球迷最期待嘅畫面終於出現嘞，美斯喺右路接應沙治羅拔圖嘅後踭妙傳殺入禁區，再起左腳狂抽入網，攞到佢今季第一個「生波」入球，柏迪完場前再幫巴塞「埋齋」贏5:2，近五場西甲首次報捷。
睇番紀錄，原來美斯對上一次喺西甲踢後備，已經係2019年9月嘅事。連埋今次在內，佢喺職業生涯試過五次後備上陣「起孖」，最近一次就要數到2013年5月，而當時嘅對手正正又係貝迪斯，真係夾都冇咁啱。
對於有傳美斯係因為懶散而被貶做後備，朗奴高文就一口否認，佢澄清話呢位33歲老將踢完對基輔場波覺得有啲唔妥，純粹係因為狀態問題先會冇正選踢。事實上，巴塞嚟緊食粥食飯都真係靠晒美斯，事關今場傷出嘅18歲新星安素法迪，經檢查後證實左膝半月板撕裂，可能要唞成五個月。