隨住市場對於美國大選嘅陰霾散去，環球市場過去一周顯著反彈，當中有兩個現象值得留意。
第一，喺美股市場上，資金陸續追捧落後股，例如Freelance搵工平台FVRR因應疫情跑出後，近期同業股份UPWK公佈季度收入只係超過預期7%左右，今季收入預測亦唔算好特別，稍勝預期業績已令股價單日狂升逾四成；至於TWLO同業Vonage亦追落後挑戰高位。美股投資者對於20至30億美元市值嘅落後股突然大感興趣，投資者11月份大可以喺低市值美股繼續尋寶。
第二個現象睇返港股，個別落後舊經濟股圖表有見底回升迹象，例如疫情最重創嘅新創建（659），公路、飛機租賃業務皆重創，股價一直同疫情大牛市絕緣，但股價日線RSI同MACD都形成底背馳，鞍鋼（347）、中鋁（2600）亦出現相似情況，中煤能源（1898）受惠中國打擊澳洲動力煤進口，股價亦似準備追落後。
11月份市場未似大跌，連日急升過後自然要有心理準備迎接波動市況，主要指數唔似有條件一口氣繼續爆升，高位整固機會偏高，揸住主流股份或會chok到月尾，資金確有機會流入落後股炒作，扒冷嘅話，嚟緊隨時有驚喜。
晉佳