趁市靜轉寫八卦。虛銀掌舵人平日制訂發展方針、落實策略，是銀行的關鍵兼靈魂人物，無獨有偶，4間虛銀的CEO同樣有渣打背景，似乎渣打成為新一代「虛銀CEO搖籃」。
先講渣打牽頭成立的虛銀Mox。話事人顧海（Deniz Guven）接掌虛銀帥印之前，出任渣打銀行設計及客戶體驗部環球主管，土耳其型男一名，不時將heart share掛在嘴邊，予人暖男感覺。
匯立銀行行政總裁謝學海曾任渣打台灣CFO，摷返2018年渣打台灣年報，當時佢嘅年薪屬於「1,500萬至3,000萬台幣」呢個組別，當1兌4台幣，月入31萬至62.5萬港元，過檔由零開始的虛銀，隨時要減人工。不過，做人唔係咁膚淺嘅，杜夫人相信，投身虛銀大家庭，除咗一腔熱誠，應該係對銀行業的愛和責任。
平安壹賬通銀行開業首個主打產品正是與貿易通合作推中小企貸款。做貸款業務除咗要有系統配合，信貸風險團隊亦相當重要，呢方面，行政總裁馮鈺龍應付有餘，佢曾任出安信CEO，其後加盟渣打，業務涵蓋個人貸款及無抵押貸款，之後仲升任該行個人金融業務前董事總經理兼個人銀行產品主管。
至於天星銀行新任行政總裁姚文松（Ronald），曾與佢共事的友人分享，大讚Ronald願意同下屬講解，是一位好好先生，「有遠見、有衝勁」。佢轉投舊舖信銀之前，都喺渣打香港工作過，不過佢係阿仙奴球迷，唔係渣打長期贊助嘅利物浦。
人，一生的際遇實在太微妙，4位虛銀CEO都曾在渣打成長，巧合地，仲係渣打香港大中華暨北亞區零售銀行主管兼董事總經理尚明洋（Samir Subberwal）愛將。如果話，花旗是銀行界「少林寺」，渣打睇嚟都應該係「虛銀CEO搖籃」喇！
杜夫人