修咸頓喺上周五英超主場以2:0擊敗紐卡素，那怕只係一日都好，呢場之後係呢間南部球會喺英超28年歷史首次上到榜首，亦係佢哋等咗32年再嘗喺頂級聯賽高踞榜首嘅滋味。不過修頓都自知英超一哥個位唔會坐得耐，所以就喺twitter出po抽特朗普水，想學呢位美國總統叫停大選點票咁「STOP THE COUNT」，一心割禾青。
修頓憑住查阿當斯同史超活岩士唐上、下半場各入一球擊敗紐卡素，賽後8戰16分升上榜首，亦係喺1992年成立嘅英超，第29支喺單日比賽後領先嘅球隊。修咸頓上一次喺頂級聯賽帶頭已經係1988年9月嘅事，原因好大程度都係因為早人哋一日開波，所以球會亦好識玩，公關即刻把握「黃金24小時」，趁住未俾其他球隊過頭，一於盡情燒炮仗慶祝。
修咸頓喺球會twitter貼咗個英超聯賽榜出嚟，仲要抄埋特朗普早幾日寫住「STOP THE COUNT」個tweet，一方面想割禾青，同時亦諷刺「侵侵」喺部份搖擺州份點票俾對手拜登反超前之後，要求暫停點票由頭數過嘅做法。
雖然唔少網民都睇死「聖人」好快就會跌番落嚟，但今季以借將身份由愛華頓重返修頓嘅禾確特就認為佢哋近6仗贏咗5場，表現有目共睹，升上榜首絕對係實至名歸。唔經唔覺已31歲嘅禾仔仲話有幸返母會效力，令佢有「回春」嘅感覺。修頓領隊哈辛赫圖亦都話隊波嘅表現真係幾得人驚，但其實呢啲都係球員努力嘅成果。
