現年36歲鄭俊弘（Fred）與28歲何雁詩昨日在沙田某酒店舉行婚禮，加上是何父農曆70歲壽辰，雙喜臨門。因疫情仍有限聚令關係，婚宴只邀請約50名親友出席。兩人於昨晚在大埔設宴，約有70人獲邀參加。一對新人昨穿上中式禮服，由陳瀅、陳嘉寶（Anjaylia）、賴慰玲、蔡思貝、Super Girls的吳嘉熙（Cheronna）任姊妹團，張頴康和張子丰等兄弟團列隊迎接。何雁詩頸上掛有一串金豬、手臂則有五對龍鳳鈪，還有金戒指及三隻鑽戒，一隻是奶奶所送、另一隻是求婚戒指，一身金器奪目耀眼。
新娘子何雁詩於傍晚5時挽着爸爸的手臂，在眾姊妹引領下進場，鄭俊弘先致辭多謝到場親友，其後何雁詩致辭及唱了一首歌，雙方交換戒指後，鄭俊弘揭起新娘子頭紗，何雁詩就好主動咀老公。簽紙儀式完成後，何雁詩興奮「Yeah」了一聲，全場爆笑，充滿歡欣氣氛。
何雁詩受訪時指鄭俊弘眼淺：「估唔到佢眼淺過我，我以為我眼淺啲，睇住佢講愛的宣言都估唔到佢喊。」她坦言自己寫下愛的宣言交由鄭俊弘念出來，部份內容只有兩人知道：「有啲感動、有啲搞笑，最主要係互相廝守，同埋佢長命過我。」鄭俊弘說：「玩遊戲已眼濕濕。」
提到陳瀅爆開門利是有八位數，鄭俊弘笑說只是鏡頭效果：「不過私底下個數都好得體。」至於造人大計？他說：「呢啲冇咁快，等我哋遲啲先計劃，未諗到細路嗰邊住。」
蔡思貝與陳瀅透露早上接新娘時非常順利，陳瀅笑指收了大大封開門利是：「拎落好重手，八位數，見到暈一暈。」兩人續爆新郎在遊戲環節穿上美人魚裝唱動畫《美人魚》主題曲，眾姊妹表示簽紙儀式十分感人。而賴慰玲則說：「我可以借個仔喺佢哋張床度跳吓，我個仔幾靈㗎！Uncle聽到都好開心。」希望助兩人開枝散葉。陳嘉寶附和指賴慰玲囝囝好靈：「佢個仔喺我張床跳吓，我就有咗。」
