《好好拍電影》好好睇。這套紀錄片記載了許鞍華的愛，對電影，對家人，對朋友，對同學，還有對香港。
拍了超過40年戲，許鞍華到今天73歲仍在拍，她在紀錄片尾段說：「我好忠於（香港）呢個地方，我想做一啲嘢！」一路走來，文念中說許鞍華的電影「都係講緊好多好多香港嘅轉變。」
如美孚新邨，如天水圍，「《男人四十》拍咗好多張學友住喺美孚新邨個環境，去到《桃姐》劉德華都係住美孚新邨，已經唔一樣。講許導演嘅故事，同時講緊香港電影嘅故事，亦都甩唔到講好多香港改變。」
文念中由盛名的美術指導變身導演，為好朋友拍下一套講人話的紀錄片，真話，所以好聽，好睇。許鞍華說，要為香港做點事，文念中則說，要好好地生活，「我覺得佢（許鞍華）係一個好貼近生活嘅人，俗語話齋『好接地氣』，呢啲嘢反而令到一般觀眾會有共鳴！」
片中最尾的一句對白，出自許鞍華在威尼斯影展拿下終身成就獎的謝辭，「Long Live Cinema！」應該不只電影萬歲，也是香港萬歲。
撰文：文嘉龍
文念中說：「我根本就冇諗過想做導演！」竟然人生第一次導演的作品，是拍一套好朋友的紀錄片。許鞍華一個訊息爽快回覆：「可以！」文念中就由2016年開始記下許導的光影，「突然間覺得咁少香港電影人嘅紀錄片，自己拍《明月》（《明月幾時有》美指工作）嘅時候，我哋喺開平拍，日日都一早5、6點坐車出發，一齊生活喺一個地方，如果呢個時候做就最啱啦！」
為甚麼是許鞍華，不是王家衛、關錦鵬？「我從《男人四十》開始認識佢（文念中為《男》片美指），拍完成為好朋友，耐唔耐都有約飲茶同埋去睇戲，除咗工作關係仲係朋友關係。我覺得做人物傳記紀錄片，如果得到被訪者信任係好緊要！我同佢係好朋友，我過年會去佢屋企拜年，又會同佢阿媽一齊去飲茶，我哋比較深入交往，我覺得可以喺採訪上比較深入啲；但係譬如王家衛，我就可能要花比較多時間去建立一個朋友關係囉！」
文念中眼中的許鞍華魄力驚人，幾乎是他認為最勤力的一位導演，但在紀錄片中，與許鞍華合作過的攝影師好友關本良則說，關於勤力，許鞍華曾半笑半認真回應：「勤力有X用咩！」文念中說：「佢真係好勤力，每拍一部戲，佢事前所做嘅功課，資料搜集或者搵好多參考，佢想盡量去投入；另外我好欣賞阿Ann（許鞍華），佢會將每一場戲畫分鏡頭，我好記得《黃金時代》拍攝過程，佢每一日都畫低晒需要拍嘅鏡頭，淨係嗰一叠分鏡紙都可以出一本書！」
拍足四年時間，文念中邊拍邊接下其他電影美指工作，將賺來的都投放在紀錄片之上，真正出心出力又出錢，「拍攝時間好長，我都要去籌集一啲資金，我都要繼續做美術指導呢個工作去謀生，然之後再去拍，因為我都full time請咗兩個同事一齊去做呢件事，後嚟有申請少少政府funding幫助少少，主要係我自己出錢。」
另一個難處是，拍拍吓發現原來隨時連朋友都冇得做，文念中覺得，是時候停機了。「有啲說話，佢只會同朋友講，未必想同鏡頭或者想同導演講，你可以想像，有時你約朋友出街，但係原來佢係導演，究竟嗰句說話係同導演講，定係同朋友講呢？我好怕去到一個位，為咗拍攝而連朋友都冇得做，嗰段時間我打電話約佢飲茶，其實佢又知道你根本就係想約我去拍，唔係想約我去飲咖啡，去到一個咁嘅位，自己都覺得要停下，等佢覺得再收到我電話，係真係約佢飲咖啡，而唔係想拍佢，大家都想回復返呢個朋友身份！」
由美術指導變導演，文念中大學時修讀平面設計，一心想入電影行由副導演做起，誰知竟入了電影公司當發行部職員負責文書工作，「亂打亂撞做咗發行部，我係美術底，所以文書一定做得唔好，覺得唔係好適合，跟住經朋友介紹，好快轉咗去美術部，一做就做到𠵱家！我入行都係因為舒琪導演，佢介紹我畀區丁平認識，我第一部幫區丁平做助理服裝設計，係套古裝片叫做《神經刀與飛天貓》，當時好大cast，有張學友、張曼玉、張敏、梁家輝、林志穎、葉蘊儀，台灣導演朱延平。」
從未接觸過服裝設計的文念中，當時連針線都未識縫，邊學邊做跟區丁平做了幾部戲的美術，再經他介紹認識了張叔平，1995年正式為徐克的賀歲片《金玉滿堂》擔大旗做美指，只得三星期時間在邵氏片場搭建一個酒樓大景，辛苦趕工下完成。
「跟住完咗之後就幫阿叔（張叔平），喺王家衛公司做咗大概六年時間，做咗《墮落天使》、《春光乍洩》同《花樣年華》，跟住開始自己出嚟再做其他戲，之後好好彩2000年嘅時候，《心動》攞咗電影金像獎最佳美術！」去年，文念中在家中「櫳底」發現寶藏，一堆《花樣年華》在吳哥窟的絕密劇照，他在社交平台「出土」後引來很大迴響，他說：「連王家衛都叫同事搵我，你可唔可以畀返original我呀！」時維1999年，迎接千禧年，身在泰國的劇組人人都想回港，「點知佢（王家衛）突然之間話下個禮拜去柬埔寨拍ending，阿叔突然間要返香港做嘢，美術部得我一個跟去，又要跟場景又要跟服裝！呢輪我執嘢又摷返當時我哋拍《2046》已經剪走晒嘅片段啲相出嚟，全部冇公開過！」
最難應付的導演，非王家衛莫屬。「我諗最難應付都係王家衛，因為佢好多時畀你嘅籌備時間好急，挑戰好大同時亦都訓練到你隨機應變。」
許鞍華同樣很急，有時發很大脾氣，「通常喺現場令到佢發脾氣，都係佢覺得會影響到演員表現，正如佢排好晒戲，啲演員正要進入去演，你就嚟整頭髮、set咪、整件衫，佢就會好急，話你哋阻住晒啲演員，但係佢唔記得咗人哋想整嗰時，佢話，你哋唔好郁住，畀我排咗戲先……其實喺佢眼中，冇嘢緊要得過演員點樣演戲，影響到演員表現，就會觸碰到佢容易發脾氣嘅底線！」
由2000年憑《心動》獲金像獎最佳美指，多年來文念中都是頒獎禮常客，至今獲得四座金像獎，有最佳美指又有最佳服裝造型，其中《黃金時代》和《明月幾時有》都與許鞍華合作。「我都算好彩，一入行碰到啲好出名嘅美術，啲人都會因為你做過啲乜嘢戲，而搵你去幫忙做另一啲工作。我嗰個年代，我都覺得算搭咗尾班車，生活上叫做唔係太過多憂慮，當然我一定唔可以講得上係好富足嘅人，但我覺得我還可以囉！」
文念中說，很多人以為他近年長駐內地，「我唔知點解俾人印象好似成日喺大陸，雖然我冇乜間斷同大陸導演合作，但唔係話住喺大陸。有好多合拍片，係香港導演返去拍，其實係同香港人合作緊，只不過個job喺大陸發生。我識得有好多香港嘅美術住喺大陸，直情將基地搬咗返大陸，我唔係囉，我嘅屋企、我啲屋企人全部喺香港，我冇諗要住喺大陸囉！」文念中的大女兒已經18歲，小兒子16歲，兩人都在香港讀書，他捨不得離開妻兒，曾有人出高四倍價錢要他留在內地為電視劇開工，他也不為所動，「我聽到要留咁長時間喺大陸，我又唔係好想喎，我自己有家庭喺香港，嗰個錢都唔細㗎，半年搵多四倍錢喎，但我當時諗吓，我唔係好有錢，但我衡量一下就覺得唔係好值得囉，如果要離開屋企人咁長時間！」
正如許鞍華，近年難免與內地拍合拍片，但毋損她對香港的熱愛，文念中也是，「我當然好鍾意香港啦，非常熱愛呢個地方。喺電影尾段，許導演講嗰一番說話，其實某程度上亦都表達咗我對香港同樣睇法，我哋好希望喺呢個時候可以盡量去做一啲嘢，我哋識拍戲就盡量去拍好啲戲。」
許鞍華早前在威尼斯影展獲頒終身成就獎，她說去年為新片《第一爐香》在香港做後期時，正值示威高峯期，離開剪片房時到處催淚煙。如果《好好拍電影》未停機，跟拍埋這一段日子，會否又是另一個面貌？「我都有諗過，如果未停機會係點呢？可能唔一樣……因為過程好長，由2016年到2019年，我當時都冇乜心力再去因應社會變化，而喺戲入面有啲乜嘢改變。」
這一年的改變當然大，由社會運動到全球疫情，文念中說：「疫情當然令到成個社會元氣大傷啦，我哋一啲習以為常，好垂手可得嘅嘢，快啲可以回復正常！冇人諗到喺電影入面，ending去維園點蠟燭、玩花燈、食月餅，呢一個moment真係唔知幾時先可以再有，無論因為社會變化或者疫情變化，好日常嘅嘢已經變得好珍貴！」
疫情下的香港電影業，從未如此艱難過，但文念中說，這兩年間又好像看到了另一個畫面，「呢兩年多咗好多低成本，但係又好有社會議題，都係我哋日常生活面對嘅古仔，商業上都叫成功喎，未至於賺大錢，但係你可以生存到！」
話說首映當日，有觀眾問文念中怎樣可以入行，他的答案是：「不如你好好地生活先啦，我冇講話唔好入行，其實嗰位觀眾已經入咗行，佢後尾走嚟遞張卡片畀我，佢係ViuTV，佢有工返㗎！我話先諗吓大家如果可以好好地生活就更加好喇！」
搞掂咗生活，先好入行。唔係點生活到？