【本報訊】去年中爆發逆權運動期間，連儂牆遍地開花，至去年底，政府開始大清洗多幅連儂牆，載滿民意的七彩牆壁如今已不復見。「可唔可以係做到佢哋撕唔走呀、鏟唔甩呀？」視覺藝術家陳嘉興腦裏盤旋着連儂牆重生的畫面，於是萌生出連儂衣。儘管刻下我城的自由空間大減，任何明示暗示抗爭意志的聲音影像都動輒得咎，但陳嘉興堅拒自我審查，連儂衣只屬美學的發揮。
陳嘉興對香港前景不太樂觀，但「悲觀唔代表消極，我成日都建議悲觀中要更加積極」。他說，香港未來走向觀乎世界局勢，「早輪好多人被捕，但都放返晒出嚟，亦都有啲人被捕，上咗大陸走唔返出嚟。𠵱家好多情況都係睇國際關係或輿論去決定」，香港或香港人仍有很多事可以去做，只要知道自己可以承受幾多代價。
連儂衣意念源自去年底多個連儂牆被拆，「你見（當時）好多新聞都係連儂牆俾人去搞呀，去禁制、清洗，一路以嚟都有留意呢啲新聞」，設計概念是「流動」、「be water」。他解釋，連儂衣原型是一件雨衣，「因為上年有幾位朋友，梁先生（梁凌杰）佢跳咗落嚟」，雖然剪裁以雨衣為樣辦，但所用物料卻非雨衣質地，「因為我唔期望啲人落雨着佢出嚟，所以物料考慮輕便啲、舒適啲，所以唔係膠質」。
連儂衣的設計須考慮很多問題，「唔係一件衫，擺啲紙上去就係囉，因為人會郁，啲memo（便利）紙會唔會跌出嚟，啲（膠）袋會唔會磨擦磨爛呀」。衣服上有很多位置要調動，且細節位亦要調節，「過程要多次嘗試，個辦都做咗兩、三次」。初辦早於去年完成，卻碰上武漢肺炎爆發，加上天氣轉熱，直至最近才正式推出。
港區國安法生效後，藝術家與設計師或因憂觸法而在構思時自我審查。 陳嘉興表明不擔心，「如果你覺得連儂牆係一種美學嚟講，我覺得發揮美學唔係一個有問題嘅嘢，亦都唔係宣揚緊佢𠵱家底線所講嘅嘢」。但他承認，有藝術家或從事創作的人都會考慮港區國安法，「我暫時仲未有好大擔心或恐懼呢一樣嘢，因為都知道大概個範圍可以去到邊度，我哋都揣摩緊個範圍，國內好流行一句說話擦邊球……咁睇吓我哋擦成點囉」。
連儂衣每件售價850元（不含便條貼），每件均由香港師傅人手縫製，每周最多製作約三件，全屬香港製造。
他表示，成本佔售價約三分之二，扣除成本後將全數捐贈612人道支援基金，「呢個完全唔係一個牟利嘅項目，對我嚟講一啲利潤都冇，完全係我想體現呢個idea出嚟」。他還希望日後能相約買家，一起組成人形連儂牆，實踐計劃的初衷。
如欲訂購，可電郵[email protected]直接訂購或查詢。如需試身，可前往石硤尾JCCAC賽馬會創意藝術中心2樓L207社區文化發展中心，預約電話2891 8482。