杜汶澤的12場「香港企硬」talk騷，前晚在九展開鑼，入口設有提示要佩戴口罩才可進場，並要先量體溫，紀念品除常見的T恤、布袋外，亦有雨傘和口罩套裝販賣。阿澤曾表示收到同行致歉，預告未能赴約睇騷，結果當日有阮民安（Tommy）、王喜、柳俊江、盧覓雪、林日曦、鄭中基、公民黨前成員陳淑莊等來撐場。
整晚演出笑聲不斷，開騷前現場播出由黃秋生做導師的教學片，阿澤老婆田蕊妮負責做監製，至於學員就有王宗堯，莊端兒，莫竣名等，之後王喜以忠勇毅身份預告開場。到正式開騷，穿美國國旗boxer的阿澤從後台出現，繞場一周。當晚阿澤換了三套衫，除「香港企硬」黑Tee外，亦有穿上西裝，他笑言穿上西裝後：「就算垃圾望落去都唔似垃圾，就好似林作。」現場螢幕即播出林作穿西裝照片。整場騷阿澤論盡圈中藝人，不但重提當年和容祖兒交惡事件，又寸撐警的梁家輝虛偽，其間提到美國大選，則笑指是被連登改名「燒山」的蕭若元燈死特朗普（Donald Trump），四圍辣火頭。太太田蕊妮則做特別嘉賓，中場時獻唱許廷鏗名曲《青春頌》。
阿澤提到跟他交惡的容祖兒說：「2014年去伍樂城演唱會做嘉賓，台上講笑話容祖兒拍完《Diva》攞唔到影后，但我攞到影帝喎，唔知佢係咪好唔開心，佢第二朝喺社交網寫咗『民主英雄杜汶澤』，我好『感激』提醒咗我。我自細夢想唔係做英雄……大陸冇戲拍咪香港拍，香港冇咪去馬來西亞……又拍《空手道》，又畀我攞到獎喎！」當日祖兒撰文鬧爆阿澤踩低別人抬高自己，又怒罵：「你就是我在娛樂圈中唯一一個討厭的人！」阿澤前晚唱出改了歌詞的《痛愛》：「全港天昏地暗，已劃滿傷痕鎖我辱我反抗就勇敢，全世界睇到都傷心，香港戰爭。」
阿澤指當年回內地工作，有日跟經理人霍汶希（Mani）食早餐，「轉彎空地有個阿伯賣波，有城管趕佢走，城管一拳窩佢心口，啲波散到周圍都係。」阿澤想落車幫手，但遭Mani制止並說：「你唔好落車阿澤，你咁落車，我哋英皇集團擺咁多心機同時間喺你度就會冇晒。」去到餐廳，Mani說：「中國幾好，連韓國牛肉都有得食，我哋香港人真係要多啲上嚟見識吓。」阿澤跟Mani說：「你同我聽住呀霍汶希，以後你做咩，諗清楚先同我講。」並說：「自此後佢真係冇咩嘢同我講。」
阿澤在騷中講到譚詠麟和曾志偉等人出席警務處處長無罩飯局，他以「皇帝」來比喻明星：「警務處長就可以有好多，天皇巨星只係得一個，啲明星咁戇X，唔記得自己係皇帝，走去同太監食飯。」阿澤講到最咬牙切齒的，是曾出席撐警活動的梁家輝，指他好虛偽，「去到邊都叫人加油，佢教我，你對佢哋（支持者）好啲，佢哋會感謝你，睇你嘅嘢，所以我早排見佢同警察講加油，撐警，X佢老味！」
阿澤提到2010年左右陳慶嘉導演找他拍《人間喜劇》，他好感恩，「我去多謝每一個支持我嘅人，早場、午夜場，邊間戲院都去，後尾佢哋畀咗一個名叫『謝票』。」他指很多明星都去謝票，笑話：「有次同周潤發拍戲，佢問我，點解咁古怪，啲人去畀幾十蚊睇戲，要去多謝人，邊個冚X鏟諗出嚟呢？咪就係我囉。」
阿澤亦有出盡力揶揄北上搵人仔藝人，他以王祖藍、William陳偉霆（的士陳）做例子，指兩人返內地賺好多錢，而的士陳現時賺錢多過古天樂，入福布斯百大名人榜：「全港搵錢最多佢，咁留喺香港托咩，俾你哋笑佢整容呀！」他又指王祖藍：「𠵱家一年搵九千幾萬，中國天王，你哋唔識笑，14億識笑就得。」他謂封殺前有上內地拍戲，覺得人民幣「好易呃」：「喺人民大會堂做首映，完咗先係戲肉，去夜總會慶功，啲女多到呢。」阿澤指老婆當晚都在現場：「我梗係扮純情唱歌，我老婆好唔高興。」
阿澤指四大天王都係黃，首先話郭富城叫得「阿王」一定是黃，然後指張學友，「學友不停喺中國開巡迴演唱會，實質係捉逃犯，如果陳同佳聽到，驚到佢連粒癦都跌X埋呀！」他指：「學友咁叻捉逃犯，都唔做逃犯條例代言人，你話佢幾黃。」數到黎明，他唱出《願榮光歸香港》歌詞：「黎明來到……」他又指當年看到報紙講，「話劉德華幫我填氹，我嗰時返寰亞，老細係林建岳，佢老竇係林百欣，劉德華老竇係劉德華老竇咋喎，邊個夠膽喺林百欣個仔面前話幫我填氹？填氹就冇，淨係幫個政府填海啫。」
