阿澤講起當年做亞視好窮,認自己是軟飯王,但指食軟飯有兩個層次:「一,你對自己冇信心,覺得一世都要靠人,好似香港人𠵱家咁,百幾年都要靠人,以前要叫人事頭,𠵱家又叫人阿爺,好喇,俾人恰到上心口,又要等邊個選總統。二,對自己有信心,覺得一定會掂,只係形勢比人差,呢啲咪叫be water囉。」又說:「但我都相信自己有日會係亞視天王,問過好多女人借錢,食吓食吓我由田蕊妮接咗手,咁我梗係有問佢借啦,我問佢借咗三萬蚊。」
阿澤指田蕊妮答:「得,三萬蚊唔係叫做借,係投資,我相信有日會可以問你攞得返。」阿澤續道:「我真係唔知係佢腳頭好,定我時運高,同佢一齊之後我又真係順風順水。」阿澤講自己被封殺三次,曾跟吳君如、陳可辛等人反23條後被封殺,之後解封拍《無間道》,但內地不能上映,因為電影講卧底警察、賣毒品,「試問有邊個地方有警察咁仆街冚X鏟?」
提到未封殺前於內地工作,曾跟有勢力人士吃飯,飯局中,遇葛優與姜文,阿澤跟姜文打招呼卻被當透明,他笑說:「你試下落九龍灣呀,睇多人識你姜文定多人識姜濤呀?」