【名家足路】
【對決場次︰馬德里體育會vs卡迪斯】
估唔到9月一度有機會挑戰擂台寶座，結果臨尾做唔到盟主之餘，10月就一瀉千里咁輸到淨番2,000幾分，包尾降班，喺度都要為自己畀山埃貼士講聲唔好意思。今個月冇得同其他名家一齊玩擂台，但就多咗個欄位寫多啲字繼續分享貼士。如果真係覺得我呢刻都反唔到底，當然歡迎讀者買對家，但我自己就唔信邪，大家又不妨聽下我呢個燈神點講先作定奪喇！
今次同上月擂台盟主牽牛兄對賭嘅係西甲波。牛兄係西甲fans，但我都唔係完全冇跟西甲波，今季就好留意卡迪斯（圖）呢隊防守力幾好嘅「升班馬」，家陣竟然排緊第五，同今周對手馬德里體育會同得14分，只係得失球差輸對方。今次兩隊交手，卡迪斯係作客一隊，但1支5場不敗、作客都贏過皇家馬德里嘅球隊，受讓一球/球半其實算筍。
佢哋已經三場冇失波，正選門將謝利馬斯列迪斯馬暫時西甲5場正選有15次成功撲救，平均每場都有三次，喺西甲撲救率榜中排第五。進攻方面，大家最熟識莫過於係踢過曼城嘅尼格度，呢位當年喺香港大球場食泥嘅前鋒，今季踢到第7輪比賽已經有2入球3助攻！
睇好卡迪斯另一原因，係因為馬體會本身就患得患失。蘇亞雷斯入「會」後似乎同新隊友未夾啱，祖奧菲歷斯又唔穩定，對於要踢歐聯、一周兩賽嘅佢哋，輪換一定會帶嚟影響，覺得卡迪斯未必輸到兩球或以上，下盤博得過。
文：盧卡東尼
《一燈決》係今季新欄目，由上月擂台盟主同上月燈神拗吓頸，睇吓讀者信邊個。