現今世界已無主流傳媒、非主流傳媒之分，只有主流平台與非主流平台之別，目前facebook係全世界最體積龐大之主流平台，不知有多少KOL靠佢搵食，中國大陸最大平台就係微信、微博，但在中共中宣部的嚴密監管下，微信微博並非如fb一類，暫且不講。左丁山日日收到不同朋友群組傳來之fb及YouTube之個人評論，好多評論員並非知名度高，但據講人人有十萬八萬以上「追隨者」（followers）或訂戶，有一定影響力。
呢類評論員唔好睇小，言論不容輕視，因為佢地講到似層層，把口又講得暢順，普通人幾易相信，其實佢地所講嘅，如果聽眾肯做fact check（查證，例如左丁山），就知道不少人係信口開河，不盡不實，純粹係發表佢地個人意見而已。
現時有好多人懶於閱讀長篇評論，鍾意睇YouTube五分鐘八分鐘嘅影片或fb傳聞，故此假消息周圍飛，令人防不勝防，容易中招。咁嘅環境下，仲講主流傳媒與非主流傳媒之分？無謂嘥氣啦，普通人點會着意去區分，只有精英分子及高級行政人員仍然會刻意閱讀金融時報之Big Read及紐約時報專欄而已，如果憑閱讀呢類刊物而審閱民意趨向，可能輸死未天光，搞政治競選，尤其會中招，特朗普的忠粉，究竟有冇人睇紐時、金時、華爾街與經濟學人呀？香港市民又有幾多個會睇南華早報呀？
公關界老友比較瞭解目前傳媒分裂、紛亂嘅局面。公關K曾經向左丁山講：「冇facebook、YouTube及WhatsApp之前，我啲同事只要日日睇住幾張報紙，六個電台、電視台嘅新聞就可以評估公關效果，依家失驚無神有啲五毛收錢在網上攻擊我地，跟住有人在網上社交媒體廣推有害我地客戶嘅傳聞，我地就窮於應付，因為隨時有可能有報紙不知就裏就轉載或者跟進，令我地客戶形象受損！」左丁山深表同情之餘，同時亦驚覺不排除陰招處處，例如古老相傳有社團人物搵金毛在舖頭門口擺盆桔，跟住就有黑毛上門拍心口話可以保護舖頭不受騷擾！現實世界太複雜，傳媒零散化、分裂化、個人化（KOL橫行）之後，好令人羨慕左丁山上一代搞公關只須聯絡好華僑工商星島！可憐嘅係，特區政府警察還以為傳媒係六十年代之華僑工商，一定會聽政府之笛。