【名家足路】
【對決場次︰馬德里體育會vs卡迪斯】
上個月成為擂台盟主，不過盈餘都係600幾，當然唔叫滿意。今個月同「燈神」盧卡東尼喺《一燈決》交鋒，首戰西甲馬德里體育會（圖）主場對卡迪斯，佢就對卡迪斯下盤好有心水，不過睇佢上個月輸淨2,000幾分，《一燈決》想挑戰盟主，真係同卡迪斯今次作客馬體會一樣，螳臂擋車啫。
冇錯，馬體會周中先踢完歐聯，仲要作客幾遠嘅莫斯科，1:1和火車頭，都叫做收貨，小組保住第二位，出線形勢唔差。睇番上星期四支踢完歐聯嘅西甲兵，返到嚟聯賽只得2勝1和1負，成績真係麻麻，不過2支贏波球隊其中1支就係馬體會，輕輕鬆鬆贏奧沙辛拿3:1。因為武肺疫情遲咗開「咧」，如果有份踢歐洲賽，一周雙賽都係基本，對球員輪換都幾大考驗。不過馬體會長年喺資源唔太多嘅環境下，長期排名前列，教練施蒙尼喺限米煮限飯呢方面嘅功力，真係唔使懷疑，今季兩場歐聯賽後聯賽，都順利贏波，今季聯賽主場保持不敗，2場勝仗都淨勝對手2球或以上，讓一球/球半都冇有怕。
卡迪斯紙上戰績當然唔錯，8戰4勝2和2負，代表作係爆冷擊敗皇馬；新加盟前鋒尼格度引人憧憬，話晒踢過吓曼城，不過對香港球迷嚟講，最深印象都係佢喺大球場食泥，講真佢去曼城都係後備居多，之後浮沉幾季今季先返西甲，相反馬體會一樣有老牌英超射手蘇亞雷斯同迪亞高哥斯達夠踢過利物浦車路士，級數比尼格度更加高，點秤人腳，馬體會都秤贏，上盤一定要入手。
文：牽牛
《一燈決》係今季新欄目，由上月擂台盟主同上月燈神拗吓頸，睇吓讀者信邊個。