靚聲歌手馮曦妤本來與模特兒男友Leon今年6月5日結婚，惟因疫情被迫押後，昨日她在社交網上載兩人結婚相，禮服又型又潮，玩味十足，她留言︰「啲道具超正，用咗我最愛嘅tiffany blue同粉紅色背景。」
馮曦妤回覆《蘋果》時指剛簽字完畢，她表示讀誓詞時有甩漏，律師要她重讀，更自爆感動落淚：「好感動，老公就好冷靜，好cool冇喊，我哋曾經分手，復合後再拍咗兩年拖，經歷好多嘢。」簽字儀式因疫情關係只能容納20人，她直言有朋友因未能出席婚禮感失望︰「明年7月30日補擺喜酒，希望到時擺得成。」36歲的她稱想盡快生B：「有打算生呀，但又唔想大住個肚擺酒，真係唔知點好，順其自然啦，有就係天上畀我哋嘅禮物。」