現年25歲𡃁模謝芷蕙（Cammi）16歲時戀上陳冠希（Edison），兩人「舌吻」照流出驚爆娛樂圈，惟戀情見光死。Cammi近年主力打理時裝生意，但感情生活不愁寂寞，九年間換畫四次，男友非富則貴。近日讀者陳先生向《蘋果》爆料，指Cammi最近搭上有米新歡William，兩人於萬聖節更cosplay鬼新郎及鬼新娘，陳先生指：「個男仔成日喺Ig晒靚錶，佢以前女朋友都唔使做嘢，William未試過喺Ig貼女仔相，估唔到萬聖節就貼咗同Cammi嘅咀嘴相，Cammi只貼單人相，但佢哋都互有畀like對方。」
Cammi昨日向《蘋果》承認戀情：「同佢識咗五、六年，最近先一齊，性格基本上了解，啲相係Halloween造型，cosplay鬼新娘新郎玩吓！」她又大讚男友說：「佢對我好好，相處幾好，冇乜拗撬。我同佢屋企人食過飯。暫時畀佢八分，可加可減。」Cammi透露男友大自己七年約32歲，從事金融行業，但她避談兩人是否同居，問到其社交網晒名牌飾物和手袋是否男友所送？Cammi轉話題說：「佢會煮飯、煲湯，好好味。」新歡William曝光後即被起底，有網民爆料指男方是有婦之夫，Cammi回覆時護男友：「多年前，我識佢嘅時候已經離咗婚了。」
自爆有「感情潔癖」的Cammi，討厭男友講大話，與Edison分手後，2014年戀上內地富二代，男方打本兼教她在內地開店賣時裝，拍拖四年卻分手。
同年Cammi與澳門賭廳富商交往，同遊日本時被讀者踢爆，Cammi直認拍拖，但否認男友是賭廳富商，反指對方以前在澳門做生意，拍拖一年後，Cammi發現男友講大話立即狠撇，去年她與女伴遊蘇梅島時，被指搭訕老外，今年才情歸金融才俊William。
