【中環在線】螞蟻集團失驚無神唔上市，搞到借咗孖展嘅投資者一身蟻。富途證券就俾市場中人插「做壞規矩」，第一個走出嚟全數退還手續費同孖展利息畀客。結果其他證券行備受壓力，惟有「焗跟」。
富途證券話事人鄔必偉（圖）同華華憶述當日情況，話經佢哋公司認購有超過20萬人，螞蟻話唔上市，佢哋接到2,000個電話狂問。但退還款項決定非常重大，話晒會蝕千萬，嗰晚管理層討論到凌晨3點先扑鎚。鄔必偉話，決定退款係因為疫情已接近一年，生活艱難。唔能夠只係諗自己，以客戶為中心都唔應該只係口號喎。
佢對於同行抱怨話一笑置之，仲講唔會用高標準要求同行，亦冇要求佢哋跟，不過佢哋跟得，就證明做法係好，又話富途決定嗰陣冇考慮營銷策略。不過騰訊話晒係富途股東之一，對家出事，當做宣傳呢筆錢都用得抵啦！
李華華