拜登勝算高唱入雲，就算特朗普入稟要求重新點票，都無阻全球股市放煙花。目前市況應如何操作？從大戶博弈角度，最簡單打開牛熊街貨圖去睇，25500至25600最後一個重熊區都清晒，理論上即時再推高的誘因不大，就算劇本係再推上，先「後抽」儲幾日熊仔街貨似乎較合理。
恒指自7月以來首次突破250天線（25419），兼且升穿今年1月以來的下降軌，仲有大成交配合，睇落相當靚仔。不過，今年7月初仲出現同類情況，突破下降軌大成交爆上，但升市只維持了3日，9 RSI衝到77見頂，當日成交額2,500億元。至於今次恒指9 RSI約處72水平，成交1,767億元，都未見非常超買或「散貨」的現象。
想買貨可以買乜？昨日在網台節目提供了四個板塊：內需、醫療、物管、教育。拜登對華政策有待其本尊闡釋，目前市場憧憬China Joe純過隻羊，當中美回到從前蜜月期咁去炒，似乎過於樂觀，所以魏力挑選的都是與中美局勢關係不大的行業，加上9月以來已作深度調整（特別是物管股），而行業增長趨勢持續，相對值博率較高。當然，如閣下認為侵侵會「玩嘢」搞寸個場，靜觀其變亦無壞。
魏力