日前話「all in 炒螞蟻」嘅連登網民、有「燈神」之稱嘅麵咪媽，佢前晚講完螞蟻一定係香港上到市，冇幾耐港交所就話螞蟻押後上市，成班連登仔當佢神咁拜，話佢連螞蟻咁大隻嘅IPO都燈死，連另一被連登仔封為「燈神」嘅「燒山」蕭若元，噚日凌晨特登發文，話自己今次輸咗畀麵咪媽！
燒山前日喺Twitter發文，明明螞蟻已經分咗股票同收咗錢，質疑全世界最大上市竟然可以煞停？有網民即留言：「唔好同媽咪麵（即麵咪媽）作對」，之後燒山噚日凌晨喺佢Twitter寫咗句覆網民：「我已經輸咗」，變相認燈力不及麵咪媽，有網民即回應「安慰」燒山：「蕭生係燈神 麵咪媽就係燈神之神」，亦有網民同燒山講：「求下您同麵神一齊燈燈中共」，亦有網民話可能因為燒山唔喺香港，燈力弱咗，始終猛虎不及地頭蟲！
不過，兩大燈神Round 2決戰已開始，事關噚日麵咪媽力撐美國總統候選人拜登贏，但燒山一早話特朗普大勝，暫時八方睇，燒山今次燈中機會大過麵咪媽，若今次燒山「勝出」，就可證明佢寶燈未老！
李八方