國家領導人梁振英創立嘅「803基金」噚日再次申請司法覆核，繼上次要求教育局公開專業失當教師資料，今次狙擊屋宇署對毛孟靜議員屋企涉嫌僭建唔執法。803基金搬出10年前林鄭月娥仲做緊發展局局長嘅發言做依據，質疑署方唔跟政策，希望法庭指令署方重新考慮，甚至直接下令署方做嘢。話時話，梁振英自己都經歷過僭建風波，唔知佢有冇為案件分享吓心得咁呢?
803基金主力懸紅緝拿抗爭者，點解僭建又關事，基金話佢哋係推廣法治同公民意識嘅非牟利組織，有資格對公然犯法嘅僭建打官司。
案件牽涉毛姨姨同老公Philip居住嘅淺水灣道住宅。入稟狀話，住宅兩個車位擅自加建變成居住用途嘅僭建屋，持續35年，傳媒近10年報道過起碼59次。基金話，𠵱家只係要屋宇署用丁屎人力物力出份清拆令，唔執法極唔合理。
基金兩度去信投訴，署方8月4日回信話執法有緩急先後，毛姨姨間屋現時用途冇明顯同即時嘅危險。基金質疑按林鄭以往講法，署方不嬲會先發命令禁止亂改用途，然後排次序處理，𠵱家冇發命令係唔跟政策喎。
李八方