90年代無綫當紅花旦張可頤，在事業高峯期，2005年因為拍內地劇《長恨歌》，太投入角色導致甲狀腺出問題，停工一年休養，經歷過後，她對人生有新領悟，學懂了如何享受生活。踏入50歲的張可頤，訪問中似乎放低了當年的執着，取而代之多了一份淡然，又指今年讓她醒悟不少：「2020年好似消失咗，有生之年唔會忘記呢個日子」。
久違了的張可頤，最近演出ViuTV劇集《暖男爸爸》，她日前在尖沙嘴接受《蘋果》專訪時，笑談自己有所轉變，她說：「𠵱家係進步咗，以前唔識得愛自己同放過自己，嗰陣係啱啱入行，未識去消化睇一樣嘢，唔止工作，私生活都成為焦點嘅時候，成日都覺得唞唔到氣，成日都擔心啲相影得自己靚唔靚，睇到啲新聞寫得唔好又唔開心，好似冇咗自己，成日忟自己，搞到氣場會壓迫人哋，啲人以為我發脾氣。」
現階段對於張可頤而言，放下執着，她說：「人大咗，諗自己少咗，但求係唔使人照顧。」她續說：「2020年好似消失咗，有生之年唔會忘記呢個日子，好多嘢醒悟咗，人生好無常，好多嘢預料唔到，都未講話自己有病，如果過咗十年八年之後，有其他病痛，咁點算呀？當人生喺風平浪靜嘅時候，真係要諗多少少，當你行緊高位，唔好太過份高興，但當你人生低谷失意時，亦都唔絕望，如果自己做到嘅，就係為自己準備，盡量去做，如果做咗，到時候都冇路行，呢啲就係天意，我最唔想係自己後悔。」
在《暖男爸爸》中，張可頤與鄭中基飾演一對在生活中互相扶持的朋友，可以說是比愛情線更加深入的感情線，張可頤入行後曾經拍過多次拖，最後都是分手收場，小姑獨處多年，她坦言都希望身邊有一個「阿榮」，不過她說：「你唔好唔記得，就算你有一段感情，唔代表一定好開心，喺入面有好多嘢都要修煉，學習同妥協，獨善其身好似好自私，我有我偷偷哋開心，搵到錢自己使，唔使同人分，買到呢啲自由，要付出代價，就係要忍受寂寞，可能喺情人節、過年、中秋、元宵，可能好孤獨。你問我係咪好享受寂寞？唔係享受，我唔會畀自己跌入去一個好負面嘅寂寞入面，我嗰種寂寞係獨處嘅快樂，喺屋企聽吓歌，執吓屋，係另一種嘅開心。」
曾經自嘲為「單身狗」的張可頤，坦言有過對愛情絕望：「有時覺得算喇，有就有，冇就冇喇，不過我今日最新嘅諗法，呢個世界係冇一個perfect match，係work返嚟，慢慢變心目中最理想嘅情人，我唔會唔再期待愛情，我好鍾意愛情，一定要有，就算現實冇，都要睇韓劇搵返嚟呀！」
撰文：唐琛悠
張可頤自從在2012年轉投香港電視演出《來生不做香港人》後，已經有一段時間沒有參與電視劇，今次在《暖男爸爸》中飾演單身的保險經紀，對於今次與ViuTV合作，她說：「真係一個新嘗試，收劇本唔係一本故事大綱，而係一本漫畫書，未試過，我即刻好有興趣，覺得一定要試，反正我都未試過同Viu合作，亦都因為自己咁耐冇喺香港螢光幕出現，希望可以畀觀眾一個新鮮感，所以咪即刻應承。」
