中共19屆五中全會閉幕，發表會議報告，內容機械化，口號式文字充斥，睇嚟睇去最重要嘅係講兩個核心，就係（一）中國以共產黨為核心，共產黨以習近平為核心，只有共產黨才能帶領中國向前、和平發展、人民致富、國防力量強大。換言之，中國必須倚賴、追隨習近平；（二）以後經濟發展以創新科技為核心，自力自強大事發展科技，輔以內需外需雙循環（即是不能放棄外資賺外滙）。
啱唔啱呢？以此問中國專家M，佢話雖不中亦不遠矣，中共公文有不少文字係多餘嘅，睇到外人昏亂，最緊要捉正其要義，其餘可以不理。五中全會顯示，政治上習近平牢牢控制黨機器，2022年繼續留任走唔甩，胡錦濤以前指定嘅隔代接班人胡春華一定冇行，再等多五年已經年近七十了，仲邊有希望。在共產中國，做預定接班人是一個危險。至於創新科技，係美國制裁華為之直接結果，因為有了制裁，才有切膚之痛，驚覺「中國芯」不如人，「中國芯」全憑台積電製造，「中芯」落後起碼十年，而要追上嘅話，又受制於荷蘭供應EUV（光刻機）；要自製光刻機，原來中國未有先進技術，要搵日本（日光公司）合作，換言之，處處受制於人，過往五毛多寫「厲害了中國」，如在芯片領域，現實就係「死火了中國」。故此咯喎，中共指揮中國傾全力發展芯片（台灣香港叫晶片）刻不容緩，相信萬億巨企如螞蟻、阿里巴巴、騰訊等亦要為之貢獻交功課，騰訊靠手遊（網上遊戲）根本唔係甚麼對國家有用之科技啫。
後來見到一位電腦教授，一位理科教授，問佢地點睇。兩位教授都從西方價值觀論述：「內地無學術自由，即使研究科學亦服從上頭命令，向搵銀着眼，即是更注重應用技術，希望上市賺大錢，對基礎理論研究不重視。譬如搞芯片，並非電子製造工程咁簡單，需要數學物理化學電腦電子及製造工程各系列人才一同研究合作，創新更要思想自由，不能論資排輩及聽黨委指揮。」去美國搵個「錢學森」回國效勞得唔得呀？教授為之失笑：「錢學森係不出世之天才，神級火箭科學家被美國麥卡錫主義迫害，遭美國遞解出境，返到中國梗係有報國之氣，死砌爛砌。現在中國超一流人才到咗美國，一心落地生根入美籍過美國生活，處境唔同了！內地到美國大學搵頂尖科學家回清華北大，要畀多兩三倍人工㗎！」咁又幾好，在北京搵多幾年錢可以來香港再搵過！