政治一日都嫌長，大選終極結果未出爐，美式「章魚哥」雖然出動過，仍難解港人忐忑。美國占星家預言今次大選點票會點到……樂觀估計等到六號，即是明天就有分曉，唔會大亂。上帝鬆一口氣，周日冚旗休息。（祈求占星專家是遠視，拉近一睇今日已有結果。）
世紀之戰除了美國親友之間衍生紅藍對決鬧交，香港這邊，評論員KOL與網民各執一詞擦出火花。手中無票，心中有氣，插嘴干預美國大選還是有這種自由，吹得佢脹咩？但市民要記住，藏有一支叫做武器的雷射筆都會被法官判為「案情嚴重」，撐侵者猛叫制裁維尼，国安法的警棍今日未扑下來，難保七個月後才上門拉人封艇。
香港人要做好N手準備，貫徹be water哲學。水能覆舟，破釜沉舟，攬炒一鑊熟，不是香港人目前的理性選項。民主共和兩黨，破天荒對香港問題達成共識，香港人必須食住條水，亦步亦趨，毋忘初心。登仔的醜聞，令人聯想自斷六親的鄭月娥，老拜登學唔到這種慈母，冇迫個仔忽然從美國失聯，從此不准蒲頭。打算捧個女做第一位女總統的阿侵，更要謹慎，unfriend都冇搞，停止fb打卡，勿用電郵，還要戒Twitter四年！