「蘭桂坊之父」盛智文（Allan Zeman）做生意高調瞓身，曾為谷宣傳扮壽星公、扮水母，古靈精怪在所不計。這位傳奇商人對家庭事卻非常低調，絕不張揚，他其實有位跟他一樣熱愛香港、設計珠寶的中非混血新抱何永嘉（Melinda Zeman）。Melinda日前第一次接受傳媒訪問，以流利廣東話說：「 香港就係我屋企，我冇計劃移民！」又自爆愛煲宮鬥劇。
有「蘭桂坊新抱」之稱的Melinda一周五天都在蘭桂坊食飯，訪問當日中午，一行出大樓就碰到老爺盛智文巡店，對生意絕不鬆懈。盛智文是德國出生、移民加拿大，再落籍香港的猶太人，新抱Melinda同樣是地球公民，爸爸祖籍非洲加納、英國居住，媽媽是香港人。
「我英國出世，五歲嚟咗香港，喺呢度長大，香港對我嚟講就係屋企。我好鍾意香港，覺得真係好方便，無論係食嘢、交通，人嘅思想方面都幾open-minded，好friendly。喺美國讀大學時，真係好掛住香港嘅廣東菜。」Melinda典型外國人樣子，一開口的純正廣東話，經常令人嚇一跳，「係呀，好多人聽到都覺得好搞笑。其實我仲好鍾意睇古裝劇，睇過好多，數之不盡，細個嗰時啲《還珠格格》、鄭秀文拍嗰套好似叫《大頭綠衣鬥殭屍》，最近嗰啲我記得，好似《甄嬛傳》、《如懿傳》，我都有睇。」
睇古裝宮鬥劇，人人追睇後宮如何為爭寵勾心鬥角，Melinda就專睇妃嬪的打扮，「宮入面啲女人，戴住啲好靚好靚嘅首飾，覺得每件首飾都可以帶出人嘅唔同個性，成件事好有氣質。」她第一件首飾，來自媽咪送的周大福金鏈，因為去年舉行了一個mini trunk show，令她開始認真去做，創立珠寶品牌Bouchier。品牌名字同樣來自一個人名，「我搵名搵咗好耐，終於搵到佢：Guillaume Bouchier，係一個法國珠寶商，好耐好耐之前，由巴黎飛去中國，為宮廷入面嘅女人設計珠寶，佢帶咗歐洲工藝同風格去中國，覺得呢個故事好有意思，我哋都係東西文化結合，所以用咗呢個名字」。
Bouchier以簡約有趣的設計為主，如鑲滿鑽石的chunky手鏈、單圈耳環，以及充滿玩味的double rings、耳殼夾等，亦將傳統白金、黃金加入時尚粉紅色、螢光綠色、全部珠寶made in Hong Kong，由香港師傅製作，「唔敢講話帶動經濟啦，至少可以支持吓本地人嘅小生意。我好好彩，發現到香港真係有好多師傅，係好高技術，完全係國際水平，嗰啲工藝、手藝非常非常之靚，希望畀全世界都知道啦。」
Melinda除了湊仔女，亦出任蘭桂坊市場創作總監、做珠寶設計，閒時會在家夾band，老公打鼓彈結他，她和女兒唱歌。盛智文「聯合國」大家庭全視香港為家，「我自己都算係一個global citizen，香港對我嚟講，就係我屋企。好多地方我都好鍾意，好似係山頂啦，因為我四個小朋友都喺山頂出世；第二係香港仔，細個時媽咪會帶我去食魚蛋，同埋太子花墟我都好鍾意。我哋冇計劃移民，因為我相信香港嘅未來。」撰文：林妃
更多精采時尚內容，盡在http://add.appledaily.com。