美國總統大選投票今日結束，究竟係特朗普定拜登贏？八方截稿前都未知，不過呢場影響全世界、左右中美角力嘅大選，肯定好多港官同香港政界都關注，作為香港特首嘅林鄭月娥噚日都被記者問點睇美國大選，佢冇講撐邊個，但唔少政界人士從佢嘅回應分析，777應該係睇好拜登，否則唔會話希望「新上任嘅美國總統」唔會隨意因政治打壓、對香港作無理影響。
777噚日出席行會前，被問到點睇美國大選，佢話喺過去一年中美關係大前提下，香港亦受到不利影響，佢話美國政府喺新一屆總統領導下，如何睇中美關係，香港喺中美關係重要性就要由總統及其團隊評估，佢強調香港同美國關係屬互惠裨益，「唔係我哋賺咗，或美國賺咗」，所以佢希望「新上任嘅總統」同佢嘅政府，全面考慮在港工作嘅美資企業人員，唔會隨意因對港政治打壓令香港受無理影響。
有政界人士話，777雖冇講想邊個當選美國總統，但佢講明希望新上任嘅總統唔好再對香港政治打壓，「咁梗係睇好拜登會贏，改變特朗普對港政策，唔通佢想侵連任，自己打倒自己嘅對香港政策咩！」
李八方