舊利舞台值得保育嗎？當然值得，那真是香港人的集體回憶，從陳百強演唱會到香港小姐總決賽，還有無盡的名導演大電影首影。
皇都戲院呢？相信那是舊日子北角人的集體回憶。
古物古蹟辦評為三級，50年代初、1952年建成，前身為璇宮戲院。其獨特建築風格實需積極保育，貴為香港一級歷史建築，建築師劉新科及George W Grey締造世上稀有的眾多拱橋支撐屋頂；穿過九曲十三彎空間神奇地寬敞的戲院部份，摸上屋頂也費周章。
上得屋頂豁然開朗，多層交錯的拱橋年久色相破落充滿魅力，吸引無限，眾人舉機打卡，霹靂啪喇……印象就是Bauhaus，並非德國式工廠，卻有着類同未塗脂抹粉轉身藝術專區前的七九八工廠（北京）相似色調氣質，襯托着《歌聲魅影》般雕欄玉砌。
改名皇都之前，1952~59年原名璇宮戲院，相信毫無關係，美艷親王羅艷卿名劇《璇宮艷史》跳上心頭，直接聯繫卻是「璇宮舞廳」這個孰真孰假曾否存在的符號。
曾經兩台電視粵語及國語深宵影院忠實擁躉，友儕一度對話的語調偷師自吳楚帆、梅綺、容玉意、容小意、關德興……踏上不過大半個世紀、連百年都未到的璇宮舊蹟，感受傷逝比潮流興的「集體回憶」更深。
香港人愛集體回憶，左又回憶右又回憶，那回憶的包袱比任何人家中的老爸老媽房間內堆砌的舊物不遑多讓，人人當正自己收買佬，跟收買佬不同，人家爛銅爛鐵即收即賣莫等善價費事阻碇；家中老人形形色色的保留都屬無價寶，咪想創你個心思想代勞清理一叠叠舊報紙……一張都唔少得，缺一不可！
我媽在生不時提醒：夾咗唔少舊版五百蚊紙、一百蚊紙，大張到棉胎咁㗎，仲有鑽石玉器，丟失唯你是問！
以為阿媽靠嚇，人去後，將舊物清理，鑽石玉器沒有，卻搜出好幾叠鬼咁大張五百一百蚊紙。
聽聞皇都地皮發展，地產商將保留戲院部份不單止，還會活化戲院；可作重新包裝再用的事情多的是，見大家雀躍萬分在屋頂不斷打卡，直接想起按照我們舊時九龍城寨，砌出九曲十三彎長沙舊時舊城區「文和友小集巿」，人潮旺過旺角的景象，禮失求諸野，借鏡未嘗不可！