香港電訊技術員擅自登入公司電腦，搜尋同擷取警員家屬資料，再報料畀Telegram頻道「老豆搵仔」，早前經審訊後裁定不誠實取用電腦等罪名成立，噚日被判監兩年。警方梗係嗱嗱聲下晝到區院門外見記者攞彩，喺簡報會尾聲時，旁邊嘅王婆婆王鳳瑤就開聲狙擊，問：「PK幾時死呀？777幾時死呀？」出唔出到街？警察𠵱家做直播好叻叻㗎，王婆婆梗係「被滅聲」，段說話被警方fb直播cut咗。事關警方一向直播簡報會，都會等埋發言警員轉身走人先熄機，但噚日簡報會，王婆婆開聲冇耐，畫面就停咗。
講返呢場小插曲，警方喺簡報會完結前問記者有冇進一步問題，此時王婆婆大嗌：「有呀！我問呀！PK幾時死呀？777幾時死呀？」又話：「政治迫害可恥！」冇耐一班警員無視王婆婆，轉身走人，王婆婆尾隨佢哋一陣後，就返入庭內聲援其他手足。
李八方