前曼聯名宿傑斯雖然昔日喺場內球技出眾，但場外嘅品德認真麻麻，以前就爆出過偷食弟婦同婚外情事件，搞到要同前妻斯泰茜離婚收場。以為已經46歲嘅傑斯會修心養性，點知禮拜一英國《太陽報》爆料，傑斯涉毆打現任女友凱特，俾英國警方拉咗，隨時連威爾斯主帥嘅職位都保唔住㖭！
事發喺禮拜日夜晚10點幾，傑斯位於英格蘭沃斯利價值1,700萬港元嘅豪宅傳出爭吵聲，結果警方接報到場，曼徹斯特警局發言人就話：「一名30幾歲嘅婦女受輕傷，唔使接受治療，一名46歲嘅男子就涉嫌2宗襲擊罪被捕。」據報呢位疑犯就係傑斯，經過一輪盤問後，第二日已經獲保釋，傑斯嘅發言人就話：「傑斯已經否認一切襲擊指控，佢正同警方合作調查事件。」
雖然傑斯唔肯認，不過威爾斯國家隊好快就做出決定，足總宣佈今月三場國際賽都唔會由佢帶隊，即係代表暫時停職，由助教羅拔比治頂上。
事實上，打女友嘅傑斯情史非常豐富，初戀喺高中已經發生，但成名後就飛咗初戀女友，之後同過電視台主播丹妮、女星維妮雅泰萊、曼聯青年軍隊友大衛加特拿個妹艾瑪、前妻斯泰茜，加上現任女友凱特相戀過，其中丹妮同凱特都屬於「撬牆腳」所得，不過最爆嘅都係喺前妻陀住B嗰陣，去夜總會識咗娜塔莎，後嚟娜塔莎就算嫁咗畀傑斯細佬洛迪高，傑斯仲同娜塔莎保持咗長達八年嘅不倫關係，其間傑斯又搭上過威爾斯模特兒托瑪斯。
偷食弟婦同婚外情事件喺2011年曝光後，前妻斯泰茜當時仲好撐傑斯，點知佢都係死性不改，再被發現喺自己餐廳內同一名女侍應調情，結果生咗兩件嘅斯泰茜，三年前同傑斯都係離婚收場。之後傑斯就同咗現任女友、任職公關嘅凱特一齊，拍咗拖都成三年，以為佢哋關係穩定，點知爆出打女友事件，唔知傑斯會唔會又再情海翻波呢？
其實曼聯七小福近年都不斷闖禍，曾經踢過南華嘅前曼聯中場畢特，舊年4月一樣涉襲擊妻子被捕，最終和解獲警方撤控；另一七小福史高斯，舊年亦被英足總起訴佢涉非法投注140場球賽，判罰80,000港元，就連萬人迷碧咸都唔係完美男人，2004年曾出軌搭上私人助理盧絲。