律政司噚日喺前終審法院舉行法律周2020開幕禮，致辭嘅人士有特首林鄭月娥、終審法院首席法官馬道立同律政司司長鄭若驊，仲多咗位「貴賓」獲邀到場兼上台影大合照，佢就係國安公署副署長李江舟嘞。
其實李江舟除咗喺銅鑼灣公署辦公室開幕嗰陣，喺「特選傳媒」採訪下亮過相之外，未有喺公開場合出場。
可能有人覺得中聯辦同外交部代表都在席，李江舟以駐港機構代表出席都好合理，之不過國安公署凌駕港府，警方又無權干預，地位咁超然，副署長成為貴賓仲登台合照，未必冇微言大義。民主黨立法會議員涂謹申就話，由於法律周係推廣法律知識，今次嘅安排可能想表達國安法比一切法律更重要，「起碼政治上表達到呢種含意」，可能想「提醒」大家只係認識香港以前享有嘅法律唔夠，叫大家唔好亂嚟。又係嘅，有咗國安法，香港從此不一樣，變得好定壞大家「有目共睹」。
李八方