全世界冇一個地方及得上香港人，除了良知以外，最近掛在嘴邊的，就得反侵或撐侵。拜登呢？注意力全部聚焦登仔與中共商家的錢銀醜聞。政治黑幕離不開錢與女人，登仔似乎梅開兩瓣，而且天生冇侵侵咁精伶，後者的稅單由當選那天承諾會公開到四年後的今日，依然保密，絕對不會塞在電腦而蠢到求其拎部壞腦去維修！「壞腦門」發酵，侵粉如獲至寶，但共和黨友保持車距，你懂的。皇帝唔急太監急，傳媒繼續開火但刻意扮軟性，紐約時報索性晒兩邊陣營選民的雪櫃。網媒buzzfeed搵占星專家解讀星象逆行異象，專家認定今屆星塵滾滾，勢必翻轉宇宙。記者直接問邊個會贏。其中一位相中拜登，指對家阿侵的聲譽與地位有轉型星象。另一位雖然睇好侵侵，但星途於他有點光輝一閃即逝，然而拜登一樣難登大滿貫。而有趣在，副手賀錦麗有海王星加持喎，有機會坐正嗎？
無論邊個做總統，曾經激情揮動條子星星旗的香港年輕人，仍然有美國夢。