強人係無懼武漢肺炎！周日意甲班霸祖雲達斯鬥「升班馬」史柏斯亞，之前中咗武漢肺炎嘅主將基斯坦奴朗拿度（C朗）終於都好返可以做後備。佢喺下半場後備入替即省兩球幫祖記重返勝軌之餘，亦用表現向世人宣告「C朗 is back！」
祖雲達斯近排狀態認真麻麻，上輪聯賽僅僅逼和維羅納，上禮拜歐聯主場仲以0:2輸畀巴塞隆拿，同C朗缺陣攻力大減都唔多唔少有啲關係。今場對史柏斯亞之前兩日，C朗檢測終於都呈陰性，教練派路亦即刻將佢加入大軍名單，要呢位35歲葡萄牙前鋒救亡。
今場派路繼續用3-5-2出戰，前線由上周中上演「詐糊帽子戲法」嘅艾華路莫拉達同保羅戴巴拿合作攻堅，而C朗就做住後備先。開波早段莫拉達就突破越位接應韋斯頓麥堅尼橫傳射入開紀錄，不過冇耐就被對手中場普比加追平，半場只能夠打和。易邊冇耐派路見勢色唔對就即刻換C朗出嚟，結果佢上陣三分鐘就接應莫拉達直線，扭過對手門將再射入。之後祖記再有拉比奧特建功，完場前C朗再入12碼，以4:1大勝對手全取3分。
喺祖記對史柏斯亞前，曾經中過武肺嘅伊巴謙莫域就以一記倒掛幫米蘭贏波，同樣戰勝病魔嘅C朗都威威即刻入兩球，相信同佢隔離期間都keep住喺屋企操，又踩車又舉鐵有關。睇佢呢場狀態同落場嘅一眾球員根本冇分別，認真得人驚。今次係C朗職業生涯第二次後備入替梅開二度，賽後佢難掩興奮之情，「我一路都冇咩症狀而且感覺幾好，今日終於都可以做自己鍾意嘅嘢。意甲競爭好激烈，米蘭、拿玻里，仲有拉素都表現好好，不過我哋越嚟越強。最重要嘅係，基斯坦奴返嚟喇！」
C朗復出，教練派路當然最開心。事關球隊係佢接手後唔係咁穩定，近排仲已經有消息話高層有可能炒佢，決定搵返艾基利咁話。不過，有C朗復出後球隊就即刻贏波上返前列，難怪比賽期間派路都笑晒。