政治人物不時收到市民嘅求助或者意見反映，又或者嚟自政見不同陣營嘅指罵都係從政者之日常，但如果呢啲意見訊息好似考DSE份試題咁長，究竟係咩玩法？之鋒噚日就喺facebook專頁「求救」，將一個「身份敏感」網民PM佢嘅內容公諸於世，仲好慘咁留言問：「到底我做錯乜嘢，先導致到我成日收到呢種訊息……」
八方睇咗啲截圖，即時好明之鋒心情，有位許姓網民先用「其實我很羨慕你，真心支持香港的」做開場白，然後作出驚天地泣鬼神嘅自介：「習主席是我叔叔，我一直幫他打下手，最近我一直在想，如果現在收手還來不來得及」、「你，周庭，黎智英能出來，其實都是我給你們爭取的」，仲自爆自己係目前「中共和中國政府二把手」，筆名叫「易水寒」，大騷「功績」聲稱自己「接連絆倒王岐山，平定王滬寧，招安曾慶紅，取代江澤民，協天子以令諸侯，為中國政府之曹操，曹承相」，咦，畀人知道呢啲，有冇危害國家安全先？
故事仲有下文呀！許某隨後向之鋒連出八大問題，包括要佢答同分析香港應唔應該獨立、中華民國憲法係唔係已經過時、中國點解唔適應聯邦制等等，仲限時翌日24點前回答，如果答得好，佢就會三日之內放返「鐘翰林」喎。
網民對之鋒呢個求救好大反應，有人質疑許某要交功課所以搵之鋒代答；亦有人擔心許某精神健康認為佢要求醫，八方就擔心佢人身安全多啲，須知國安一定有搵人監視住之鋒動靜，除非呢個係佢哋自己友喬裝成網民想引人犯禁，否則係咪會隨時出動拉人？
李八方