12港人至今日已經被中國秘密扣押第72日，林鄭政府一直否認設局將12位香港人送中，但係民間冇因為咁而放鬆，聲援行動一波接一波，希望保持事件熱度，早日讓12位手足回家，繼之前全球網上行動，同埋用要求釋放12人透明卡影相，放上網以示支持後，最新一波行動就係12位設計師，就釋放12港人共同推出12款手機桌布，畀大家免費下載以示支持。
發起「Twelve to Twelve Project」嘅係12名設計師，一連12日每日喺專頁「Graphic Design Can Save Hong Kong」推出一款桌布，仲有設計師的話，相當有意義。「Graphic Design Can Save Hong Kong」喺佢fb專頁話，今次行動希望藉此提醒大家，出面仲有12位手足需要大家持續關注，同希望呢12位手足可以盡快返屋企。
第一日推出嘅桌布反應已經相當熱烈，12對眼睛囚禁喺漆黑鐵欄後失去自由，設計師「中央聖學子」話創作理念係希望香港人每次開手機時會記念仍在黑獄中嘅12位年輕港人，願他們早日平安歸來，而前日公佈嘅創作別具意義，係一位剛剛出獄重回自由、深愛香港嘅設計師，佢就算出咗獄仍然十分關心在囚手足，仍然會去聽審，出心出力。直到現在已經推出咗5日桌布，仲有7日會陸續推出，八方讀者想知道緊貼每日公佈嘅布桌，就要追蹤以上專頁，繼續聲援#save12行動同「Graphic Design Can Save Hong Kong」專頁。
李八方