建制派立法會議員何君堯近日又再受大家關注，佢喺2017年一次集會「好暴力」，提到撐港獨嘅人時話要「殺無赦」，英國律師業註冊及監管機構（SRA）下月聆訊調查佢有冇涉及專業失當行為，即係佢有機會被剔除註冊律師資格，到時名副其實叫「何已完」。
何君堯早前話如果局方一意孤行取消其律師資格，「損失嘅唔係何君堯，係整個英國政府！」似乎好似好唔上心。
不過，佢噚日喺港台節目《給香港的信》又提及事件，形容係一場謾罵同政治攻擊，堅稱自己無煽動暴力，反批評投訴佢嘅人「故意歪曲事實」，SRA明顯受誤導。同時再以去年被母校、英國安格里亞魯斯金大學褫奪名譽博士學位一事，話有「一群人」母校做此行為，𠵱家就係重施故技。
不時狙擊香港司法界嘅何君堯連英國司法界都盯上，佢話事件顯示英國學術同法律專業嘅獨立性受到損害，話英國曾經被視為法治、禮節、高尚文化嘅象徵，但有關情況俱往矣。唔知佢又有冇留意唔少香港人反而覺得，香港呢個曾經有規有矩嘅國際都市，北京極權管治下一逝不返，俱往矣。
李八方