《暖男爸爸》劇中其實暗藏抗爭符號，如劇情講鄭中基老死強尼四出媾女，三個女朋友齊集其便利店找男方對質，鄭中基send訊息給老友叫他「be water, my friend」，三女又指若強尼不現身，就「幫呢間舖頭裝修」。而《暖》劇亦選擇黃店「龍門冰室」取景拍攝，冰室老闆張俊傑日前就貼出跟鄭中基合照力撐劇集，劇中道具陳設也相當認真，甜品店取名為「良心甜品」。
監製兼導演戚家基（Peter）昨日接受《蘋果》訪問，談到劇中抗爭用語，他說：「呢個好自然，唔通仲會叫人哋隨機應變咩，香港人梗係話你be water啦，呢段時間香港人講開嘅嘢就係我哋對白囉。」對於被推為神劇，他說：「多謝香港人，我哋所有參加創作嘅人都好感動。香港好奇怪，神同人係差一線，只要你講人話，講嘅說話唔離地，就會覺得你係神劇㗎喇。我只係將我每日經歷感受到嘅嘢擺喺呢個劇入面，如果大家覺得呢個係神劇，我將掌聲畀返香港人，因為呢個係香港人嘅故事。」