歐美確診數字上升，疫情令到全世界嚟一次生產模式改變，不論第日有冇疫苗、病毒係咪消失，都返唔到轉頭。
咁多個數字之中，令高明最深印象，就係第三季美國嘅個人電腦（PC）銷售10年以來首次增長達雙位數字，連PC呢啲低科技，都發覺太慢要換。下一個趨勢，肯定係覺得網絡慢，然後就開始換。因為硬件快咗，剩落嚟唔夠快嘅因素，就會係網絡。
全球將會進入無線網絡大趨勢，Elon Musk旗下衞星網絡商Starlink將會推出上網計劃，安裝費為499美元（3,892港元），每月費用99美元（772港元），網速為50Mb/s至150 Mb/s（100Mb/s以上一般理解為「快」）。睇數字，貴得嚟亦唔算好快，當然，佢服務對象係美加冇駁寬頻線嘅地區，所以唔可以咁計。
至於香港，5G 無線上網代表有數碼通（315），因為佢哋最近推出家用5G，屋企上5G網絡唔使拉線，網站顯示月費148蚊。未來家用或者辦公室都未必再使鋪線上網，全部可以行5G 無線上網。
大家可能會問，5G高頻率要好多機站先覆蓋到，5G覆蓋夠唔夠？因為數碼通係唯一用「動態頻譜共享技術」（DDS）嘅本地電訊商。咩係「動態」、咩係「共享」？共享就係可將一條頻譜，同時畀4G LTE 及 5G 網絡使用；動態就係會因應基站附近用家流量分配使用4G LTE 及 5G 網絡，按需要調整流量，所以覆蓋到。至於點解數碼通係唯一一間行DDS技術，因為佢嘅5G基建技術供應商係愛立信（美股：ERIC）。
一場疫情，全世界突然求變，手上設備要升級，舊PC要買過，疫情將會加速5G發展，下一個趨勢，應該係由用家帶動嘅網絡設備升級潮。
高明