提起前香港足球先生李健和，各位球迷除咗會記得佢嘅黃金右腳，相信印象最深都係佢喺2000年港澳埠際賽，領紅後執起個波大大力省球證，結果俾亞洲足協停賽一年。點知貴為世界球王嘅美斯，上周六西甲作客艾拉維斯竟然學足和哥當日嘅精粹，發脾氣將個波踢向球證靴南迪斯，但唔知係咪因為佢係美斯，球證畀足面只係拎黃牌警告，唔係紅牌。但巴塞隆拿即使唔使踢少一個，亦只能1:1逼和艾拉維斯，連續四場西甲贏唔到，6戰目前得8分，錄得02/03球季以嚟最差開局，丟架到暈。
自從10月初贏咗切爾達之後，巴塞對上三次聯賽都贏唔到，上周六作客艾拉維斯諗住佢哋可以翻身喇，點知踢到31分鐘，美斯喺前場俾對手推跌後，球證冇吹罰犯規，畀咗機會艾軍打反擊，雖然碧基截到個波，但「豬隊友」門將尼圖唔肯解圍，結果俾主隊路爾斯列奧查偷走個波射入空門，令巴塞落後0:1。
之後巴塞中場法蘭基迪莊喺禁區內俾人推跌，美斯又試過喺禁區頂俾對手拉停，但球證都當冇事發生。結果去到39分鐘，美斯終於忍唔住突然「和哥上身」，襯球證走過嗰陣，特登將個波踢向對方。當然佢就冇「和哥」咁激動執波省球證咁出面，而球證好似都多一事不如少一事，只係向美斯出示咗張黃牌就算，賽後就有好多人網上寸美斯，話球王係咪有特權喎！
美斯冇被逐，反而艾拉維斯就有祖達爭波嗰陣舉腳過高變兩黃一紅，而一分鐘後巴塞就由基沙文射入今季開齋波追平，但球隊都要失兩分，連續四輪贏唔到波。美斯今場就再次冇波入，開季頭8場只係入得3球12碼，創出13年嚟嘅新低，唔知係咪仲因為夏天嘅離隊風波，影響表現之餘仲特別躁底！之前對切爾達，已經俾人影到佢喺球員通道捉住球證理論；之後代表阿根廷出戰世盃外，作客玻利維亞贏咗2:1都要同對手爆粗嗌交，今仗仲更加「和哥上身」向球證發洩，唔知美斯會唔會被秋後算賬呢？
至於早前贏咗國家打吡嘅皇家馬德里，上禮拜六就喺主場鬥侯爾斯卡，傷癒踢番正選嘅夏薩特射入世界波，相隔392日再次為皇馬入波，加上賓施馬梅開二度同費達歷高華維迪都有進賬，幫皇馬以4:1大勝，贏完國家打吡後走勢都比起宿敵巴塞好得多。