Hello，喂，今日又到萬聖節，即係西方嘅鬼節，習俗上係噚晚日落後開始過節，不過唔少藝人噚日一早開始化妝準備扮鬼扮馬，個個值得獎佢哋一粒糖。好似個肚鑼咁大嘅倪晨曦雖然一早過咗預產期，但BB都未肯出嚟，佢話原本以為坐緊月冇得玩，乜都冇準備，惟有係咁易喺個大肚上畫南瓜，老公就用白布扮鬼，用最少成本同時間過節。
周嘉洛扮米高積遜（Michael Jackson）遠睇都算似，其實佢呢個扮相係拍劇入面嘅學校開萬聖節party造型，拍戲提早過節，即係返工當去玩，幾過癮。
楊洛婷同樂隊Dear Jane主音Tim結婚後一直恩愛，加埋囡囡同愛犬，過節梗溫馨。睇佢哋嘅造型應該花唔少時間準備，媽媽個樣仲嚇親阿囡㖭！最勁係愛犬都肯配合擺甫士。
莊韻澄扮乜都好，一定唔少得晒下傲人身材，佢已經係待嫁新娘，仲話過婚後要減少性感演出，唔通要趁𠵱家晒多啲？今次扮相焦點都係離唔開心口……個心心窿。
真係想畀啲掌聲鄭欣宜（左）同鄭融，佢哋着晒古裝扮飲花酒，仲整咗條片key埋歡樂滿東華善款數字，其實佢哋只係去咗主題餐廳打邊爐，扮嘢扮得好認真呀！