上星期六寫泰國克拉運河，估唔到一位多年不見嘅朋友來短訊評論，指一啲人以為建克拉運河可以有助中國戰艦及商船由太平洋前往印度洋，衝破美國第一島鏈圍堵，係傻中之傻。點解呀，因為真正打起仗嚟，交戰一方用導彈襲擊運河的進出口，並擊沉一兩隻商船或戰艦，成條運河就報廢，有鬼用咩！
左丁山看短訊後，叫佢向藍絲群組廣推。不過又好似難為咗佢，在中環搵食，有時要顧及上司情緒，因為依家有不少客戶都係內地大款也。
不過要搵食就諸多禁忌啫，若然有人要打自己荷包，肯定要畀面色佢睇。陳百祥聲言撐警，政府頒以荷蘭水蓋以示獎勵，但撐警只係得把口，原來群眾唔buy，有一套電影叫做「時代」，由撐警演員楊明、曹永廉、莊思明等主演，內容兩個字講晒，撐警。如此內容，如此演員，安排在陳百祥同路人，愛國電影商黃百鳴嘅Cinema City影院上演，食硬嘞啩，點知道Cinema City漏夜發緊急聲明話旗下所有戲院未有為「時代」安排任何放映場次。
黃百鳴乜咁唔畀面？想當年，成龍未成老伯之前所拍嘅「警察故事」，每每收個滿堂紅，點解被大公報稱為「時代撐警」，傳遞「正義聲音」嘅電影，今日竟落得如此收場，冇戲院肯上映？中聯辦會唔會請黃百鳴食餐飯，要佢交心？
正是見微知著，星島日報（10月23日）報導，「警察特訓助肥佬投考者翻生，反修例後新常態」，又有「主婦四十」再投考警察圓夢。內容指一啲人考警察體能測試不及格，本應肥佬，但警方揀選一批施以體能特訓，等佢地再考過！警方數字顯示，近來三十歲以上投考警察人數多咗，今年四月至九月嘅比例，增加至三成四（督察）及三成二（警察），比2018至2019年度嘅比例，一成七及一成，大幅度增加。即係咁，自2019年下半年社會運動之後，青年人討厭加入警隊，那怕薪高糧準；於是一啲要錢養家（三十歲以上）之人投考比例大增，而警察缺人，來者不拒，不惜培訓肥佬考生再考過，呢種情況，幾十年來你見過未？警察形象如此難睇，理由大家都明白，唔使多講。林鄭依家只識凡事問中央，習總話要引導香港青年去內地發展，林鄭與楊潤雄計將安出？年輕人唔撐警喎，點會肯入內地吖。