基斯坦奴朗拿度（C朗）終於同武漢肺炎病毒講bye bye！祖雲達斯上周五官網宣佈，上月13號感染武肺嘅C朗，經過19日隔離後，最新一次病毒檢測結果已經呈陰性，可以返歸，即係話祖記今日作客史柏斯亞場波，有機會見到C朗重返球場。
祖記喺官方聲明講明已經喺武肺病毒檢測回復陰性嘅C朗，唔使再接受隔離，家陣就睇佢過唔過到體測，趕唔趕得切今日場波，當然最理想就喺周三作客匈牙利費倫斯華路士場歐聯分組賽復出。
對祖記嚟講，C朗復出嘅消息實在太好，皆因喺C朗缺陣下，祖記真係好頹，4場波只係贏過1場，當中兩場意甲對手都唔勁，但都係和波，搞到家陣只排聯賽第五位（未計上周六戰果）；歐聯方面，上周對巴塞隆拿睇唔到球王對決外，仲俾美斯喺自己主場攞威，貢獻1傳1射帶領對手贏2:0，賽後仲要俾巴塞官網寸話終於睇到史上最佳球員（GOAT）出現，搞到佢哋後尾只能牽強回應對方話真正嘅「GOAT」、即係C朗未現身，下月頭嘅次循環交鋒先會去魯營等巴塞見識。
C朗今次中武肺都算中得耐，大大話話成19日咁多。隔離期間剷青嘅佢，早前喺ig發帖回應留言，直接咁鬧武肺測試係廢話，好似覺得個檢測針對佢。不過，佢嘅言論引嚟意大利一位權威病毒學者不滿，暗寸佢「扮專家」：「容許我歡迎我哋嘅新同事基斯坦奴朗拿度加入病毒學家嘅圈子，我相信以後我哋同驗光師踢五人足球時，佢將會對我哋有好大幫助。」就連意大利報章《新聞報》亦批評C朗可能因為隔離太耐，搞到頭腦唔清醒。
另外，剛過去嘅周五係阿根廷球王馬勒當拿60歲牛一，C朗之前接受《馬卡報》邀請拍短片祝賀，當日就有得睇番。不過，C朗喺片入面就好幽默咁話：「你係第一，但喺El Bicho之後。」
「El Bicho」就係C朗嘅葡文外號，佢意思就係話對方就算幾偉大都好，因為有C朗，佢只能係排C朗後面嘅「第一」，但估計佢笑住咁講，都係想懶幽默，但出自佢口中，你會覺得佢咁諗又好似合乎人物性格，講真C朗點會覺得自己差過任何一位歷代傳奇球星？