【本報訊】當國泰大裁員風聲鶴唳之際，不少企業伸出招攬之手，有資深婚禮統籌師也向被裁國泰員工免費提供婚禮策劃及管理課程，獲大量網民讚好，至今已有300名被裁國泰員工申請報讀，有被裁者心懷感激，指課程令他們感受到自己「不是被所有人遺棄」。
從事婚禮統籌17年的劉智仁（Tim）解釋，今次向被裁員工免費提供婚禮策劃及管理課程，是因為覺得在疫情影響下，「每一個行業都不能獨善其身，唔可以自己顧自己」。他認為空中服務員擁有良好服務技巧及應變能力，加上該行業上班時間彈性，毋須長時間留在辦公室工作，與航空業相近，認為非常適合他們。
Tim透露，現已收到約300名被裁國泰員工申請報讀課程，受場地空間所限，現只能提供80個名額。他表示將優先選擇較「成熟」的申請人，「一嚟後生嘅出面仲大把世界，年紀比較大啲嘅可能有家室，個負擔大啲，但佢哋好有優勢，就係佢哋本身知道咩叫婚禮同婚姻」。
Tim亦提及有人不停重複遞交申請表，令他印象深刻，「可能諗住係咁出現佢嘅申請表，個命中率咪會高囉，你會幻想到佢心態係好徬徨好無助」。亦有不少人向他留言抒發被裁感受，「仲有人多謝我搞呢個活動，話原來佢哋唔係被遺棄嘅，公司唔要佢啫，原來呢個世界仲有人要佢」。