23歲的Jason，中六畢業後遠赴英國，一邊讀書，一邊工作學做西廚，直至去年反修例運動前回港。8.31晚上，他在灣仔遭警員撲倒拘捕，除被控暴動外，亦被控管有攻擊性武器，一度向他伸手的人同樣被控。Jason被捕時遭警察拖行兼棍打，滿身瘀傷兼斷骨，事後見心理學家，確診抑鬱。由於經常要覆診及向警署報到，Jason被僱主「建議辭職」。這一年，他背負着兩個標籤：「手足」與「情緒病」，但他不希望被冠以不同標籤，「為香港好嘅人，就已經係香港人，大家都係香港人」。
本案被告Jason龔梓舜被捕後遭警拖行，腰間少兩忽肉，背脊佈滿瘀痕棍印，顴骨斷裂。事實上Jason不知案發時有人向他伸手，直至得悉控方指控及翻看閉路電視，才知同案被告曾向他伸手。不過Jason認為對方當時應離開，「有得走做咩唔走？」
被捕後，他隨即被起訴上庭，回到家中經常失眠、發噩夢，在朋友介紹下看心理學家，「我仲以為自己係PTSD（創傷後壓力症），睇完原來係抑鬱」。心理學家對他說，當人面對重大事件，會激發情緒病。
Jason卻認為，他的抑鬱並非完全肇因於這場運動，「有啲人天生悲觀啲，喺英國我比較獨立，唔太鍾意同人交流，可能噏到有啲症狀，運動只係激發出嚟」。
Jason形容抑鬱就如海，「海浪唔係一直喺度，一下一下咁，唔會知佢幾時到，嚟幾耐又唔知」。情緒來襲他會封閉自己，現時靠食藥「似返個正常人」。
很多人以為患抑鬱會胡思亂想，Jason說這是常人看法最大的誤區，「其實唔會諗嘢，單純就係瞓唔着，我都唔知點解。食完啲藥，個人好難有情緒。見到啲咩都好似一個第三者咁，你話條片嗰個人係我呀？哦，咁嗰個咪我囉。有冇啲咩感覺？我冇啲咩感覺。食住藥睇片冇乜feeling」。
他說，服藥後人難有情緒，「藥物壓抑你嘅抑鬱，同時壓抑緊其他情緒」。問到他的傷勢及去年感受等，Jason多以「唔記得」回應。記憶力變差是抑鬱其中一個徵狀。問到是否希望醫好情緒病，他說：「你希唔希望，都改變唔到啲咩㗎啦，諗嚟做咩呢？」
Jason原在中環一間餐廳工作，惹上官司後不時要請假覆診及警署報到，「耐唔耐老細一定會有微言」，後期更被「建議辭職」。
這年的經歷，令他萌生一個想法，「無論係呢個病定呢場運動，我唔想冠上一啲稱號，即係『手足』、『抑鬱』。一個殘疾人，都唔想俾人認為係殘疾人士啦」。
他認為「手足」一字無謂，「香港人咪香港人，點解要冠上咁多特別稱謂標籤」。他同意「手足」一詞本意是好，但現時已被濫用，更認為以「手足」作招聘標準並不妥當，「有人覺得所謂手足好冇搭霎，唔代表另一個都係咁，唔可以用呢個標籤標榜呢班群體冇搭霎。」
Jason不希望被特殊對待，「例如你請我，係因為我係手足或被捕者，畀我一個感覺就係你可憐我，今日請我唔係認可我嘅手藝或能力，而係因為我慘，或者你覺得我為香港付出過啲咩好偉大，好似請我係因為我嘅身份，特殊通道咁，無謂囉」。
他稱，政見故然重要，「政見相同先有偈傾，但呢個唔會係first priority，大家唔啱傾自然離開」。他亦認為食肆毋須分顏色，「分咩黃藍吖，肚餓就食嘢啦」。同樣地，他也不想被標籤，「當我正常人就好」。
Jason去年從英國回港作中轉站，打算其後到歐洲學廚，豈料纏上官司。問他是否覺得香港不適合留下生活，他說：「想搵缺點永遠都搵到，一個華人去邊去邊都係外國人，留返喺自己度最好。」
對於今次面對的官司，他表示：「啱與錯，同是否遵循良知唔同，社會判定你係做錯事，咁打就企定。只係我唔覺得我冇錯，但當下嘅法律覺得我有錯，咁我咪負責。」
Jason沒評論整場運動，只稱現時少了人示威，不代表市民覺得政府正確。但他又說不希望左右別人，「公道自在人心」。
審訊完結，Jason最大感受是「終於完啦，一係就做返自己想做嘅嘢，一係就坐幾年」。他說不怕坐監，並打趣謂：「𠵱家唔使通櫃，電子㗎嘛𠵱家。有咩好驚？我日日都困喺屋企，我都唔想出街，同失去自由冇乜唔同，其實冇乜大不了。」
問到對裁決有否心理準備，他說：「接受唔到都要接受，唔通你可以走得出嚟咩，放（脫罪）同唔放我都冇諗。已經夠多嘢煩，攞苦嚟辛，為乜？」