熱刺周四喺歐霸盃J組，爆冷以0:1輸畀安特衛普，半場一口氣換咗四個人嘅領隊摩連奴嬲到紮紮跳，話自己其實諗住一次過換走晒成隊人，仲暗示要將完全冇態嘅迪利阿里放入雪櫃。唔知摩佬呢排係咪玩社交平台玩到上癮，之後仲喺ig「出po」話要罰成隊人加操，唔通佢想做球壇特朗普？
作客比利時鬥安特衛普嘅比賽，原本諗住實食冇黐牙，大安旨意收起「弗」到漏嘅哈利卡尼同孫興民，改派加里夫巴利同迪利阿里掛帥。點知全隊踢到夢遊咁款，到29分鐘仲因為客串中堅嘅賓戴維斯失誤，俾主隊中場拉法洛夫轟爆大門。見到勢色唔妥，「摩佬」半場就一次過換咗四個人，抽起阿里、卡路士雲尼斯奧斯、貝雲積同盧施素，放番孫興民、賀積查治、拉美拿同盧卡斯莫拉落場搏殺，不過熱刺都係冇乜起色，如果唔係門將洛里斯生性托走祖基利洛嘅遠射，隨時仲會輸多球。踢到58分鐘，摩佬終於忍唔住換埋哈利卡尼入嚟頂巴利，可惜都係追平唔到。睇番熱刺全場16次起腳得2次「中龍」，效率仲低過12射3中嘅安特衛普，輸波都唔係冇道理。
輸波後嬲爆爆咁接受訪問嘅摩佬承認，其實半場就想換晒11個人，佢又晦氣咁話係自己派呢班人出場嘅，要怪就只可以怪佢自己。對於迪利阿里今場難得有正選踢，但又再次冇貨交，摩佬雖然忍住冇喺鏡頭前開名批評呢位英格蘭中場，但就話記者應該心裏有數，嚟緊唔使再問佢點解有啲球員會冇份出場。
唔知係咪見美國總統特朗普嘅「twitter治國」咁成功，摩佬近排都成日喺ig「出po」，例如係踢爆歐霸外對手整矮咗個龍門框，同埋笑艾歷迪亞比賽中人有三急要中途衝入廁所解決。今場輸波之後，又趁住搭隊巴去機場嗰陣，upload咗張黑口黑面嘅相上ig，留言話「差勁嘅表現就會換嚟糟糕嘅下場，希望每個喺巴士上嘅人都同我一樣咁沮喪，聽朝11點練波！」雖然有網民覺得摩佬只係講吓笑，但退役後轉行講波嘅阿仙奴名宿基昂，就話摩連奴有乜都應該留番喺更衣室，兜口兜面對球員講清楚，作為職業領隊竟然喺ig咁樣講，見到都覺得「小學雞」！